Azərbaycanda ehsan LƏĞV OLUR? - Gözlənilən qərar…

Xəbər verdiyimiz kimi, Sabirabad və Saatlı rayonlarında yas mərasimlərində ehsan verilməməsi ilə bağlı əhaliyə tövsiyə verilib. Son aylarda ölkənin bir neçə rayonunda da oxşar çağırışlar gündəmə gəlib. Bu tövsiyələr cəmiyyət tərəfindən birmənalı qarşılanmasa da, artıq müəyyən sosial çevrələrdə dəstək qazanır.

Rayonlarda ehsan verilməməsi ilə bağlı tövsiyələr ölkə üzrə vahid və rəsmi qərara çevrilə bilərmi?

Globalinfo.az-a danışan ilahiyyatçı Tural İrfandeyib ki, təmtəraqlı yas mərasimlərinin və ehsan adı ilə təşkil olunan qonaqlıqların ləğv edilməsi məqsədilə maarifləndirmə, təbliğat işləri aparılır:

"Dinimizdə yas məclisi anlayışı yoxdur və israfçılıq açıq şəkildə günah sayılır. İslama görə, insanların vəfatından sonra sadə və təvazökar mərasimlər keçirilməli, bu zaman yalnız yaxınların dəstəyi və dua ilə yetinilməlidir. Məclislərdə lüksə qaçmaq, əslində dinin təlimlərinə ziddir. Çünki məqsəd mərhumun ailəsinə yardım etmək və mənəvi dəstək göstərməkdir. Dini Qurumlarla İş üzrə DövlətKomitəsi də bu istiqamətdə müvafiq tədbirlər görür və bunun effekti görünür. Bir çox rayonlarda artıq dəyişikliklər hiss olunur. Bu cür işlər, adətən rəsmi qərarlardan əvvəl təbliğat və maarifləndirmə yolu ilə həyata keçirilir. Əgər tövsiyələr nəticə verməsə və ya süni maneələr yaransa, əlbəttə, rəsmi qərar mümkündür.Çünki adını "adət" qoyub əhalinin bu səbəbdən kreditə müraciət etməsi və maddi çətinliklərlə üzləşməsi müasir dövr üçün arzuolunmaz haldır. Bu, həm də sosial bərabərsizlik və stress yaradan bir amilə çevrilir".

İlahiyyatçı bildirib ki, müvafiq icra orqanları bu məsələyə ciddi yanaşmalı və lazımi tədbirləri görməlidir:

"Eyni zamanda, din xadimləri dəfn mərasimlərində təbliğat aparmalı və insanlara dinimizin bu məsələyə yanaşmasını izah etməlidirlər. İslam qaydalarına əsasən, insan vəfat etdikdə cəsədi qüsl verilib kəfənlənir və namazı qılındıqdan sonra torpağa tapşırılır. Bu mərasimlərdən sonra qohumlar və yaxınlar toplaşıb dua edir, ardınca isə çıxıb gedirlər. Peyğəmbər dövründə heç bir nümunə yoxdur ki, səhabələr və ya Peyğəmbərin yaxınları dəfn mərasiminin ardınca toplaşıb ehsan yesinlər. Bu, dinin təhrif olunmasının nəticəsidir. Qonaqlara su, çay, kofe və xurma kimi yüngül tərkibli nemətlər təqdim oluna bilər. Lakin təmtəraqlı yemək süfrələri və xörəklər hazırlamaq doğru deyil".

Telegramda izləyin