Qızmar günəş altında işçi işlədən müəssisələr BU HALDA CƏRİMƏLƏNƏ BİLƏR

Əmək Məcəlləsinin 233-cü maddəsinə əsasən, havanın temperaturu 41 dərəcədən yüksək olanda açıq havada və sərinləşdirici qurğular olmayan örtülü binalarda, otaqlar və digər iş yerlərində bütün növ işlərin görülməsi dayandırılmalıdır. Milli Hidrometeorologiya Xidmətindən yaydığı məlumata əsasən ölkədə 40 dərəcə temperatur var. Vəziyyət belə olan halda açıq havada, yüksək temperaturda və günəş şüalarının altında işləmək məcburiyyətində qalan insanların aqibəti adamı narahat edir. Bu cür işlər daha çox tikinti, kənd təsərrüfatı, yol işləri və digər sahələrdə rast gəlinir. Sözügedən işçilər yüksək temperaturun yaratdığı təhlükələrlə, məsələn, istilik vurması, günvurma və susuzluqla üzləşə bilərlər.

BAKU.WS xəbər verir ki, işəgötürənlər üçün qanunvericilikdə sağlamlığının qorunması ilə bağlı müddəalar olmalıdır. Lakin bunlar olmadıqda həmin işə götürən müəssisə və ya qurmu cərimə gözləyir. Bu barədə vəkil Turan Abdullazadə BAKU.WS-ə açıqlama verib.

"İnzibati Xətalar Məcəlləsinin 198-ci maddəsinə əsasən, əməyin mühafizəsi üzrə standartların, normaların və qaydaların tələblərinə əməl olunmamasına; işçilərə lazımi sanitariya-məişət və müalicə-profilaktika xidmətinin təşkil edilməməsinə; normal əmək və istirahət rejiminə riayət edilməməsinə, o cümlədən əmək qanunvericiliyinin tələbləri pozulmaqla işçinin iş vaxtından artıq işlərə cəlb edilməsinə görə 500 AZN-dən 1000 AZN-dək cərimə edilir" -deyə vəkil qeyd edib.

İşçilərin sağlamlığını qorumaq üçün bir sıra tədbirlər də görülməlidir. Bunlar əsasən aşağıdakılardır.

İş saatlarının tənzimlənməsi: İşçilərin günün ən qızmar saatlarında işləməsinin qarşısı alınmalı, iş saatları səhər tezdən və ya axşam saatlarına uyğunlaşdırılmalıdır.

İstirahət üçün uyğun şərait: İşçilər üçün kölgəlik, soyuq su və istirahət yerləri təmin edilməlidir.

Müdafiə vasitələri: İşçilər üçün baş geyimləri, gün eynəkləri, açıq rəngli paltarlar və digər müdafiə vasitələri təmin edilməlidir.

Təlim və maarifləndirmə: İşçilərə yüksək temperaturun təhlükələri və onlardan qorunmaq yolları barədə məlumat verilməlidir.

Bundan başqa kəskin istilərlə bağlı işçilərə sərinləmək üçün imkan yaradılmalı, onlara fasilələr verilməli, fasilənin sayı və müddəti işəgötürənlə həmkarlar təşkilatının birgə qərarı əsasında müəyyən olunmalıdır.

Əmək məcəlləsinə əsasən, bu fasilələr iş vaxtına daxil edilir və fasilələr zamanı əmək haqqı işçilərin tarif maaşına görə ödənilir.

İş dayandırıldıqda boşdayanma vaxtının haqqı işçinin təqsiri üzündən baş verməyən boşdayanma kimi, tarif maaşının üçdə iki hissəsindən az olmayaraq ödənilir.

Telegramda izləyin