Sədrin şikayətçi olduğu şəxs məhkəmə zalında həbs edildi - SƏBƏB

Naxçıvan Şəhər Məhkəməsinin sədri Gülnar Səfərəliyevanın şikayətçi olduğu şəxs həbs edilib.

Musavat.com xəbər verir ki, sədr xüsusi ittiham qaydasında məhkəməyə müraciət edərək barəsində böhtan xarakterli məlumat yayan vətəndaş Kərim Seyidzadədən şikayətçi olub.

Kərim Seyidzadə sosial şəbəkə hesablarındakı çıxışında sədrin onun barəsində ədalətli qərar çıxarmadığını, 500 manat aliment ödəməyə məcbur edildiyini deyib. Sosial şəbəkədəki çıxışlarında daha əvvəlki sədr Qabil Məmmədovu da ittiham edən Kərim Seyidzadə bildirib ki, yeni sədr Gülnar Səfərəliyeva da eyni qanunsuzluqları təsdiq edib.

Kərim Seyidzadə iddia edib ki, hakimlər və sədr onu intihar həddinə çatdırıb və məhkəmə binasında sirkə içib.

Onun intihara cəhd etməsi, məhkəmə binasında sirkə içməsi iddiasının araşdırılması məqsədi ilə ekspertiza təyin edilib. Həkim rəyində onun sirkə içmədiyi qeyd edilib. Lakin Kərim Seyidzadə bununla da razılaşmayaraq həkimlərin sədrin xeyrinə rəy verdiyini bildirib.

Sədr Gülnar Səfərəliyeva qeyd edib ki, 6 ildir çalışdığı məhkəmədə həmişə vicdanlı və ədalətli olub. Onun sözlərinə görə, son bir ildə də sədr kimi çalışdığı məhkəmədə vətəndaşlar incidilməyib, çıxarılan qərarlar ədalətli olub.

G.Səfərliyeva əlavə edib ki, Kərim Seyidzadə sosial şəbəkələrdəki çıxışında məhkəmə hakimləri və onun barəsində böhtan xarakterli məlumat yaydığı üçün cəzalandırılmalıdır.

Kərim Seyidzadə son sözündə dediklərindən peşman olmadığını, söylədiklərinin həqiqət olduğunu bildirib. Məhkəmədən barəsində həbslə bağlı olmayan qərar çıxarmasını xahiş edib.

Kəngərli Rayon Məhkəməsinin hökmü ilə Kərim Seyidzadə 3 ay müddətinə azadlıqdan məhrum edilib. Onun barəsində həbs qərarı çıxarılıb və məhkəmə zalında həbsə alınıb.

Telegramda izləyin