Avtobus zolağına axşam 10-dan sonra girsə də, cərimələndi - Video

Paytaxt sakini Ramin Muxtarov avtobus zolağına saat 22:00-dan sonra daxil olduğu halda cərimələnib.

"Qafqazinfo"nun məlumatına görə, bu barədə "Xəzər Xəbər"ə danışan sürücü bildirib ki, Bayraq Meydanından Azneft dairəsinə doğru hərəkət edərkən avtobus zolağına daxil olub. Buna səbəb isə yolun əvvəlində qoyulan və səhər saat 07:00-dan axşam 22:00-a qədər məhdudiyyət olduğunu göstərən nişan olub.

Onun sözlərinə görə, saat 22:00-dan sonra bu zolağa girməyin icazəli olduğunu düşündüyündən yoluna davam edib. O qeyd edib ki, Azneft dairəsində yenidən avtobus zolağına daxil olan zaman isə yol polisi əməkdaşı onu saxlayaraq protokol tərtib edib: "Saat 22:25-də avtobus zolağına daxil olmuşam. Azneft dairəsindən Kukla Teatrına qədər olan hissədə yol polisi əməkdaşı maşını saxlayıb və 100 manat, 2 bal cərimə yazıb. Bildirildi ki, burada zolaqda 24 saat digər maşınların hərəkəti qadağandır. Apardığım müşahidələrdə aşkar oldu ki, burda heç bir kamera, qadağa yoxdur. Sadəcə olaraq nişanın altında vaxt tətbiq olunmadan və yalnız polis əməkdaşları orada dayandığı zaman cərimə olunursunuz".

O, həmçinin qeyd edib ki, cərimə kamera vasitəsilə deyil, birbaşa yol polisi əməkdaşı tərəfindən saxlanılaraq təqdim edilib. Sürücü eyni istiqamətdə olan dənizkənarı küçədə məhdudiyyətin saatla göstərildiyi halda, niyə Azneft dairəsində bu qaydanın əksini tapmadığı sualını edir.

"Bayraq Meydanından Azneft dairəsi elə bir yerdir ki, orada günün istənilən saatlarında tıxac yaşanır. Yəni burada 24 saat avtobus zolağını qoyub böyük bir tıxaca səbəb olmaq nə dərəcədə düzgündür? Şəhərin bir neçə yerində belə hallar var", - R.Muxtarov bildirib.

Mövzu ilə bağlı Bakı Şəhər Dövlət Yol Polisi İdarəsindən bildirilib ki, vətəndaş şikayətlə bağlı idarəyə müraciət edə bilər. Onun müraciətinə baxılacaq və hüquqi müstəvidə qiymət veriləcək.

Telegramda izləyin