"Gülünc ziddiyət: 16 yaşlı bir qız əxlaqsızlıq edə bilər, amma 17 yaşlı qız ailə qura bilməz" - AÇIQLAMA

2024-cü ildə 16 yaşa qədər olan qadınlar tərəfindən doğulan uşaqların sayı 63 olub.

Bu, "Azərbaycan gəncləri" məcmuəsində qeyd edilib.

"Ötən il 16 yaşda olan qadınlar tərəfindən isə 218 doğum faktı qeydə alınıb", - məcmuədə bildirilir.

Azərbaycanda yeniyetmələr arasında erkən yaşda münasibətlərə meyillərin artması cəmiyyətdə ciddi narahatlıq doğurur. Mütəxəssislər bildirirlər ki, qanunvericilikdəki boşluqlar, ailələrdə tərbiyə mexanizmlərinin zəifləməsi və mediada aparılan yanlış təbliğatlar bu vəziyyətin əsas səbəblərindəndir. Sosioloq Elçin Bayramlının fikrincə, problemin qarşısını almaq üçün qanunların sərtləşdirilməsi, valideynlərin məsuliyyətinin artırılması və milli-mənəvi dəyərlərə əsaslanan tərbiyənin gücləndirilməsi vacibdir. O bu barədə Sonxeber.az -a danışıb:

Çox təəssüf ki, bu kimi halların sayı artmaqdadır və əksəriyyəti ümumiyyətlə qeydə alınmır, rəsmiləşdirilmir. Azyaşlıların iştirakı nəzərə alındıqda isə bu, olduqca dəhşətli mənzərədir. Qanunvericilikdə müəyyən boşluqlar mövcuddur. Belə ki, Azərbaycan qanunvericiliyinə görə 16 yaşına çatmamış şəxslərin cinsi münasibətdə olması açıq şəkildə qanun pozuntusu hesab edilmir. Nəticədə paradoksal vəziyyət yaranır: 16 yaşlı bir qız əxlaqsızlıq edə bilər, amma 17 yaşlı qız ailə qura bilməz. Bu, həm gülünc, həm də faciəvi ziddiyyətdir.

"Bu vəziyyətin əsas səbəbləri arasında milli-mənəvi dəyərlərə əsaslanan tərbiyənin zəifləməsi, valideynlərin övladlarına yetərli nəzarət etməməsi, televiziya və internetdə aparılan zərərli təbliğatlar, saxta müasirlik anlayışlarının önə çəkilməsi durur. Nəticədə yeniyetmələr arasında belə hallar sürətlə yayılır.

Problemin qarşısını almaq üçün cəzaların sərtləşdirilməsi və qanunvericiliyin dəyişdirilməsi vacibdir. Əgər evlilik yaşı 18 olaraq müəyyənləşdirilibsə, onda 18 yaşa qədər şəxslərin cinsi münasibətdə olmasına da ciddi məsuliyyət tətbiq edilməlidir. Bu hallara göz yuman və övladlarının davranışına nəzarət etməyən valideynlər də məsuliyyət daşımalıdır. Əks halda, məsələ kütləvi xarakter alaraq genefondumuz üçün təhlükə yaradır və əxlaqsızlığın yayılmasına səbəb olur.

Son illərdə erkən evliliklərin sayı azalıb, lakin indi əsas problem erkən yaşda əxlaqsızlığa meyillərin çoxalmasıdır. Buna görə də məsələ ciddi diqqət tələb edir. Valideynlər övladlarının 18 yaşdan əvvəl evlənməsinə razılıq verməməli, ümumən isə belə hallara şərait yaratmamalıdır. Qanun pozuntusu varsa, cəza da kifayət qədər ağır olmalıdır ki, digərləri üçün dərs olsun".

Çiçək Sadatova

Telegramda izləyin