Azərbaycanda 24 uşaq sifilisə necə yoluxub?

Bu il yanvar-iyul aylarında ölkə üzrə sifilis diaqnozu ilə qeydə alınmış xəstələrin sayı 816 nəfər olub. Dövlət Statistika Komitəsindən (DSK) verilən məlumata görə, sifilis xəstəliyi aşkarlananların 492 nəfəri kişi, 324 nəfəri isə qadındır. Qeyd edilib ki, 0-17 yaş qrupu üzrə 24 nəfər bu xəstəliyə tutulub. 792 nəfər isə 18 və daha yuxarı yaş həddində olanlardır.

Əsasən yetkin insanlar arasında yayılan xəstəliyə uşaqlar, yeniyetmələr necə yoluxurlar?

Mövzu ilə bağlı Bizim.Media-ya danışan tibb sahəsi üzrə mütəxəssis Adil Qeybulla deyib ki, sifilisin, QİÇS virusunun ölkədə sayı artan dinamikadadır:

"İlk növbədə 0 yaş dedikdə, körpə, yeni doğulan uşaqdan söhbət gedir. Bunlara sifilis anadan keçə bilər. Əgər anada sifilis varsa, uşağa asanlıqla keçə bilir, hətta uşağın ölü doğulmasına və digər ağır fəsadlara səbəb ola bilər. Ona görə də əgər anada sifilis varsa, dərhal penisilinlə müalicəyə başlamalıdır. Bu, ən təhlükəsiz müalicə hesab edilir. Penisilin və ya bu qrup dərmanlarla müalicə aparılmalıdır. Uşaqda da tapıldısa, dərhal müalicə aparılmamalıdır".

Həkim erkən və nəzarətsiz cinsi əlaqə zamanı da yoluxmanın mümkünlüyünü qeyd edib:

"Digər kateqoriya var ki, müəyyən yaşdan sonra erkən cinsi həyat başlayır. Nəzarətsiz, təhlükəsizliyi gözlənilməyən cinsəl yaş, yəni 10-12 yaşda bu xəstəliyə yoluxmaya gətirib çıxarır. Etiraf etmək laızdır ki, bu cür kontaktlar da az deyil".

Tibb mütəxəssisi hesab edir ki, bu cür statistikalar daha dərindən araşdırılmalıdır:

"0-4 yaşa qədər uşaqlarda ola bilər ki, anadangəlmə sifilis yoxlanmasın, ana xəbərsiz olsun və bu, daha sonra müəyyən edilsin. Amma 5-10 yaşda olan xəstələrin mənşəyi araşdırılmalıdır. İkinci tərəfdən bu məsələ ilə bağlı ciddi dispanserizasiyası aparılsa, yaxşı olar. Düşünürəm ki, real mənzərə bundan daha ciddidir.

Həddi-büluğ dövrünə qədər, xüsusilə ikincili cinsi əlamətlərə qədər olan sifilisin oğlanlar və qızlar arasındakı nisbəti də müəyyən edilməldiir.

Burada sosial problemlər, hazırda cəmiyyətdə şaiyə şəklində gəzən bir sıra məsələlərə aydınlıq gətirmək mümkündür. Bu statistikanın üzərində işləmək və daha dəqiq statistika əldə etməklə bəzi məsələlərə aydınlıq gətirmək mümkündür".

Telegramda izləyin