Kənan Quluzadə: "Yanvardan iyuladək Azərbaycana 1 milyon 478 min xarici vətəndaş səfər edib"

"Bu il daxili turizmdə artım müşahidə olunub. Ötən il ərzində ölkədə ümumilikdə 23 milyon daxili səfər qeydə alınmışdısa, bu il göstəricinin 25 milyona çatacağı gözlənilir".

Oxu.Az xəbər verir ki, bu fikirləri jurnalistlərə açıqlamasında Dövlət Turizm Agentliyinin sədrinin müşaviri Kənan Quluzadə deyib.

Onun sözlərinə görə, təxminən 40 faiz - yəni 10 milyona yaxın səfər yay mövsümünün payına düşür:

"İyun-avqust aylarında Azərbaycana gələn xarici vətəndaşların, təxminən, üçdəbiri, yəni 32 faizi məhz yay mövsümündə ölkəmizi ziyarət edir. Rəsmi statistikaya əsasən, yanvar-iyul aylarında Azərbaycana 1 milyon 478 min xarici vətəndaş səfər edib. Yanvardan avqustadək müddətdə gözləntilər isə 1 milyon 700 mini üstələyir".

Onun sözlərinə görə, ötən illə müqayisədə ümumi göstəricilərdə təxminən iki faizlik azalma var:

"Bu azalma daha çox regional geosiyasi dəyişikliklər və münaqişələrlə bağlıdır. Ənənəvi bazarlardan olan Rusiya və Hindistandan gələn turistlərin sayında 12-14 faiz azalma qeydə alınıb. Bununla belə, Pakistan və Çin istiqamətində artım müşahidə olunur.

Hazırda ən çox diqqət ayırdığımız istiqamət Çin bazarıdır. Bununla bağlı "China Ready" proqramına start verilib. Məqsədimiz artan çinli turistləri qəbul etməyə tam hazır olmaqdır".

Agentlik rəsmisi əlavə edib ki, körfəz ölkələrindən, İsraildən və Türkiyədən gələn turistlərin sayında da artım qeydə alınır:

"2019-cu il Azərbaycan turizmi üçün rekord il sayılırdı. Hazırda ölkəmiz bütün göstəricilər üzrə, demək olar ki, həmin səviyyəni təkrarlayır. Turistlərin ümumi sayı bir qədər az olsa da, gəlirlər və yeni iş yerlərinin açılması baxımından vəziyyət 2019-cu ilə bərabərdir".

K.Quluzadə əlavə edib ki, Azərbaycanın turizm sektoru daha böyük axını qarşılamağa hazırdır:

"Turizm agentliklərimiz və operatorlarımız imkan baxımından bundan iki, hətta üç dəfə çox turisti qəbul edə bilər. Xidmət sahəsi ilə bağlı ciddi problem yoxdur. Əksinə, sektorda yeni iş yerlərinin açılması müşahidə olunur".

Telegramda izləyin