Mağazada məhsula zərər verən alıcı məsuliyyət daşıyırmı? - AÇIQLAMA

Alıcıların ehtiyatsız davranışı nəticəsində mağazalarda məhsullara zərər vurulması halları tez-tez müşahidə olunur. Bəs belə hallarda dəymiş ziyanı kim ödəməlidir – mağaza, yoxsa müştəri? Mülki Məcəlləyə əsasən, zərərin kim tərəfindən qarşılanacağı ilə bağlı aydın qaydalar mövcuddur.

Bəs görəsən mağazada məhsula zərər verən alıcı məsuliyyət daşıyırmı?

Mövzu ilə bağlı vəkil Ruslan Mustafayev Sonxeber.az -a açıqlama verib:

"İstehlakçı ehtiyatsızlıqla hər hansı məhsula zərər vurduqda, dəymiş ziyan müştərinin özü tərəfindən ödənilməlidir. Mülki Məcəllənin 1097-ci maddəsinə görə, mülki hüquq pozuntusu (delikt) nəticəsində fiziki şəxsin şəxsiyyətinə və ya əmlakına, həmçinin hüquqi şəxsin əmlakına və işgüzar nüfuzuna vurulmuş zərərin əvəzi zərərvuran şəxs tərəfindən tam həcmdə ödənilməlidir. Bu qayda hətta zərərin ehtiyatsızlıq nəticəsində baş verdiyi hallara da şamil olunur. Yəni, ehtiyatsızlıq alıcını məsuliyyətdən azad etmir.

Mağaza rəhbərliyi qırılan və ya zədələnən malların dəyərini alıcıdan könüllü şəkildə tələb edə bilər. Əgər alıcı zərərin onun təqsirkar hərəkəti nəticəsində yarandığını qəbul edirsə, bu məbləği ödəməlidir. Lakin müştəri özünü təqsirkar hesab etmədiyi halda, mağaza rəhbərliyi onu ödəniş etməyə məcbur edə bilməz. Belə vəziyyətlərdə mağaza yalnız məhkəmə qaydasında iddia qaldıraraq ziyanın əvəzini tələb edə bilər".

Telegramda izləyin