"Əgər uşaqlar küçələrdə başlı-başına buraxılarsa, bu, həm onların gələcəyini, həm də cəmiyyətin sabahını təhlükəyə atır" - AÇIQLAMA

Azyaşlıların küçələrdə işləməsi və ya dilənməsi təkcə bu günün yox, uzun illərin problemidir. İstər sosial, istərsə də iqtisadi səbəblərdən qaynaqlanan bu vəziyyət uşaqların həm təhsil hüququnun pozulmasına, həm də onların psixoloji və fiziki təhlükələrlə üz-üzə qalmasına gətirib çıxarır. Mütəxəssislərin fikrincə, dövlətin, hüquq-mühafizə orqanlarının və yerli icra qurumlarının bu məsələyə daha ciddi yanaşması vacibdir.

Sonxeber.az mövzu ilə bağlı sorğumuzda iştirak edən sosioloqların məsələyə yanaşmasını təqdim edir:

"Küçələrdə işləyən və ya dilənən uşaqların hekayələri bir-birindən fərqlidir. Bəziləri ailələrinə kömək məqsədilə bunu edirlər, bəziləri isə ailə üzvləri və ya başqa şəxslər tərəfindən məcbur edilir. Hər iki halda da bu uşaqların uşaqlıq haqları əlindən alınır. Əslində dövlətin əsas vəzifələrindən biri onların təhsil və təhlükəsizliyini təmin etməkdir.

Bəzən polislərin və digər qurumların bu hallara yetərincə həssas yanaşmadığı müşahidə olunur. Uşaqlar "qaraçı uşaqlarıdır" deyə etinasızlıq göstərilməsi isə ən təhlükəli yanlışlardan biridir. Hər bir uşaq kimliyindən asılı olmayaraq eyni hüquqa sahibdir. Onların dərs vaxtı küçədə olması təhsildən yayınmaq, gecə saatlarında küçələrdə qalması isə ciddi təhlükə deməkdir.

Azyaşlıların üzərinə ailəni dolandırmaq məsuliyyətinin qoyulması, onların uşaq yaşda evə pul aparmaq məcburiyyətində qalması həm psixoloji, həm də sosial travmalara yol açır. Bu, gələcəkdə cəmiyyət üçün də problemə çevrilə bilər".

Mütəxəssislər həmçinin bildirirlər ki, yerli icra hakimiyyətləri bu mövzuda daha aktiv olmalıdır. Onların əsas funksiyalarından biri ərazilərində yaşayan ailələrin sosial vəziyyətini yaxından izləmək, yardıma ehtiyacı olanları dəstəkləməkdir. Hər bir risk qrupuna daxil olan ailə qeydiyyata alınmalı, ünvanlı sosial yardım və nəzarət mexanizmləri işə salınmalıdır. Təəssüf ki, indiki vəziyyətdə icra orqanları bu məsələni lazımi səviyyədə izləyə bilmir.

Əgər uşaqlar küçələrdə başlı-başına buraxılarsa, bu, həm onların gələcəyini, həm də cəmiyyətin sabahını təhlükəyə atır. Ona görə də problemin həlli üçün dövlət qurumlarının, ictimaiyyətin və ailələrin birgə fəaliyyəti zəruridir".

Telegramda izləyin