"Bəzi televiziya proqramlarında reytinq və maraq yaratmaq məqsədilə etik sərhədlər aşılır" - AÇIQLAMA

Televiziya cəmiyyətin düşüncə və davranışlarına təsir edən ən güclü vasitələrdən biridir. Xüsusilə sosial problemlərin işıqlandırılmasında etik prinsiplərin gözlənilməsi böyük əhəmiyyət daşıyır. Çünki efirdə səslənən hər bir fikir, göstərilən hər bir kadr tamaşaçıya birbaşa təsir edir və bəzən illərlə yaddaşlarda qalır.

Bəs görəsən televiziyada sosial problemlərin təqdimatında etik qaydaların qorunması nə qədər önəmlidir və praktikada buna nə dərəcə əməl olunur?

Media eksperti Azər Həsrət bu barədə Sonxeber.az -a açıqlama verib:

"Etik qaydalar istər gündəlik həyatımızda, istərsə də mediada hər zaman qorunmalıdır. Reklamdan tutmuş sosial problemlərin təqdimatına qədər bütün sahələrdə etik normalara riayət etmək vacibdir. Lakin söz televiziyaya gəldikdə məsuliyyət daha da artır. Çünki adi bir mühitdə baş verən etik pozuntu yalnız məhdud bir qrupa təsir göstərirsə, televiziya ekranında eyni hal minlərlə, hətta milyonlarla insana təsir edə bilir.

Bu cür halların nəticəsi isə birbaşa cəmiyyətin formalaşmasına, əxlaq və ədəb anlayışına mənfi təsir edir. Təəssüf ki, hazırda sosial problemlərə həsr olunmuş bəzi televiziya proqramlarında reytinq və maraq yaratmaq məqsədilə etik sərhədlər aşıla bilir. Sensasiya naminə yaradılan bu gərəksiz həyəcan tədricən normaya çevrilir. Bu da xüsusilə uşaqlar üçün təhlükəlidir. Çünki onlar gördüklərini nümunə kimi qəbul edir, ekran qarşısında izlədiklərini həyatın adi və qəbulolunan davranış qaydası hesab edirlər.

Nəticədə, əslində cəmiyyət üçün doğru sayılmayan davranışlar normallaşır və gələcək nəsillərin dəyərlərinə zərər vurur. Bu səbəbdən televiziyada sosial problemlərin təqdimatını hazırlayanlar daha məsuliyyətli davranmalı, öz sözlərinə və hərəkətlərinə ciddi şəkildə diqqət etməlidirlər. Media yalnız məlumatlandırmamalı, eyni zamanda cəmiyyətin sağlam mənəvi mühitinin qorunmasına xidmət etməlidir"

Çiçək Sadatova

Telegramda izləyin