"Valideyn komitələrinin istiqaməti və məqsədi tamam fərqli olmalıdır" - AÇIQLAMA

Son illər məktəblərdə valideyn komitələrinin fəaliyyəti ilə bağlı müxtəlif fikirlər səslənir. Bəzi valideynlər bu komitələrin təhsil prosesinə müsbət təsir etdiyini düşünür, digərləri isə əksinə, onların funksiyalarının qeyri-müəyyən olduğunu bildirir. Bəs, məktəblərdə valideyn komitələrinin fəaliyyəti nədən ibarətdir və onların əsas funksiyaları hansılardır?

Mövzu ilə bağlı Sonxeber.az-a Sosial Tədqiqatlar Mərkəzinin əməkdaşı Elmin Nurizadə danışıb.

O, açıqlamasında qeyd edib ki, hər il, xüsusən də 5 oktyabr, 8 mart kimi önəmli tarixlər gələndə, eləcə də digər bayramlar yaşananda valideyn komitələrinin uyğunsuz fəaliyyəti, onların formallığı və məktəblərdə hətta ifrat qanunsuzluqlara yol verilməsi müzakirə obyektinə çevrilir:

"Birincisi, valideyn komitələri məktəblərdə o qədər də geniş yayılmayıb. Belə düşünürəm ki, əgər 4532 məktəbimiz varsa, onların heç 3/1-də valideyn komitələri yoxdur. Nəinki 3/1-də, 5/1-də də yoxdur. Onunla belə, 5/1 də böyük rəqəmdir.

Biz artıq valideyn komitələri ilə bağlı danışmaq yox, onunla bağlı Elm və Təhsil Nazirliyi tərəfindən veriləcək rəsmi bir qərarı müzakirə etməliyik. Artıq bunun vaxtıdır. Valideyn komitələri yenidən qurulmalıdır. Onlar məktəbin pedaqoji şurası ilə ortaq işləməli və yalnız təhsili bilən (təhsil prosesinə az da olsa aidiyyəti olan) valideynlərdən təşkil olunmalıdır.

Əks halda, hər hansısa bir valideyn özünü qabağa verərək, WhatsApp qrupunda olduğu kimi komitə işində də özünü hegemon kimi göstərərək, ancaq pul yığmaq və "pul verməyən valideynə nə oldu?", "pulu niyə gecikdirirsən?" kimi kinayəli suallar verərsə, belə şəxsdən valideyn komitəsi ola bilməz.

Valideyn komitələrinin istiqaməti və məqsədi tamam fərqli olmalıdır. Bununla bağlı dünya təcrübəsindən faydalanmaq lazımdır. Valideynlərin birliyindən yaranan kiçik qrup yalnız həmin sinifdə tədrisi necə daha keyfiyyətli etmək olar sualı ətrafında düşünməlidir.

Bununla bağlı məktəb rəhbərliyinə, sinif rəhbərinə təkliflər verməli və onların necə icra edilməsinə nəzarət etməlidirlər".

Vüsalə İbrahimli

Telegramda izləyin