"Məni "urus qız" deyə tanıyırdılar, halbuki, əslində ukraynalı idim" – Yelena Sideorenko

"Özümü təqdim etməyi yadımda deyil, sonuncu dəfə məndən nə zaman xahiş etmişdilər. Bu, ulduz xəstəliyinə tutulduğuma görə deyil. Sadəcə, artıq özümü necə təqdim edəcəyimi də bilmirəm. Əgər tamaşaçılarınız yaşca daha gəncdirsə, yəqin ki, məni tanımayacaqlar və bəlkə də düşünəcəklər: "Bu qız kimdir, əyləşib orada?" Amma 35-40 yaşdan yuxarı olan izləyicilərin yadına düşəcəyəm".

Bu sözləri Sonxeber.az-a tanınmış teleaparıcı Yelena Sidorenko danışıb.

O, müsahibə zamanı qeyd edib ki, o dövrdə çox güman ki, Azərbaycan dilində danışan qeyri-azərbaycanlı bir aparıcı kimi tanınırdım:

"İyirmi il əvvəl ekranda göründüyümdə hamı deyirdi, "Urus qız, urus qız, xəbərləri aparan". Halbuki, əslində, ukraynalı qız idim. O dövrdə çox güman ki, Azərbaycan dilində danışan qeyri-azərbaycanlı bir aparıcı kimi tanınırdım. Sonra illər keçdi və həyatımın on ildən çoxunu televiziyaya, jurnalistikaya həsr etdim. Daha sonra isə marketinq və PR sahələrində çalışdım.

Son illər ərzində artıq öz tədris mərkəzlərim fəaliyyət göstərir. Bu gün əsas istiqamətlərimizdən biri Azərbaycan dilinin düzgün tədrisidir. Öz müəllif proqramım əsasında Azərbaycan dili xarici dil kimi öyrədilir. Təəssüf ki, Azərbaycanda illərlə yaşayan bir çox insanlar hələ də Azərbaycan dilini rahatlıqla mənimsəməkdə çətinlik çəkirlər.

Digər istiqamətimiz natiqlik təlimidir — burada insanlar həm nitqləri, həm də özünəinam üzərində işləyirlər. Üçüncü istiqamət isə bloqerlik məktəbidir".

Vüsalə İbrahimli

Telegramda izləyin