İsrael Demidov: "Birinci dəfədir Bakıya gəlmişəm - şəhərə vurulmuşam"

"Aktyor səhnəyə çıxanda obraz orada doğulmalı, yaşamalı, ölməli və ya yeni varlığa çevrilməlidir".

Oxu.Az xəbər verir ki, bu sözləri "Anna Karenina" tamaşasında "Aleksey Karenin" rolunu ifa edən aktyor İsrael Demidov jurnalistlərə açıqlamasında deyib.

O bildirib ki, Bakıya ilk dəfə gəlib və şəhərin cazibəsi onu valeh edib:

"Heç vaxt Bakıda olmamışam. Birinci dəfədir buraya gəlmişəm. Şəhərə vurulmuşam. Dənizkənarı bulvarla gəzdik, İçərişəhərə getdik. Bura çox gözəldir".

Aktyor "Anna Karenina"nın qəhrəmanları barədə də fikirlərini bölüşüb:

"Karenin" insan münasibətlərinin əbədiliyini ifadə edən bir obrazdır. Bu münasibətlər həmişə aktualdır: bir kişi, digər kişi və ortada bir qadın… Sual budur: insanlar niyə belədirlər? "Vronski" və "Anna" normal yaşaya bilərdilər, amma alınmır. Başa düşürəm ki, "Karenin" ondan yaşca böyükdür. Amma yaş fərqi böyük olan evliliklər də var ki, cütlüklər bir-birini sevərək yaşayırlar.

İnsanlar o vaxt da, indi də bir-biri ilə problemlər yaşayıb. Bəlkə də bir-birilərini eşitmirlər, istəsələr də, alınmır. Böyük yazıçılar da elə bundan yazırlar - birlikdə yaşamaq alınmır. İndi isə daha çətindir. İnsanların bir yerdə yaşaması ağırlaşıb. Hər şey bir az kədərlidir".

O həm "Karenin"i, həm də "Anna"nı anladığını söyləyib.

"Məsələn, "Anna" "Vronski"yə - "sən məni sadəcə sevmirsən", - deyir. "Vronski" yanında olur, sözlərini deyir, amma "Anna" inanır ki, o, artıq onu sevmir".

Aktyorun sözlərinə görə, "Anna Karenina"nın faciəsi istədiyini dəqiq bilməməsidir:

"İnsan duasında tam olaraq nə istədiyini bilsəydi, Allah ona istədiyini verərdi. Amma insanlar bilmirlər. Ürəyin həqiqətən arzuladığı şey alınmır. Onun faciəsi də bundadır".

Aktyor Tolstoyun sevgiyə baxışını belə izah edib:

"Tolstoya görə sevgi həmişə iztirabla birlikdədir. Sual budur: sən kimi daha çox sevirsən? Həmin insanı, yoxsa o sevgidə özünü?"

O, səhnədə obraz yaratmaq prosesindən danışıb:

"Aktyor üçün bunu sözlə izah etməyə ehtiyac yoxdur. Səhnəyə çıxırsan və obraz orada doğulmalı, yaşamalı, ölməli və ya yeni varlığa çevrilməlidir".

Aktyor cütlüklər üçün öz məsləhətlərini də bölüşüb:

"Mən məsləhət görərdim ki, konflikt anlarında "sevgini oynasınlar". O an sevgi hiss etməsələr belə. Özlərini niyə sevdiklərini xatırlayıb sanki sevirmiş kimi davransınlar. Bu işləyir. Mən bunu həm aktyor, həm də həyat təcrübəmə əsaslanaraq deyirəm".

O, çəkildiyi tarixi obrazlardan da söz açaraq qeyd edib ki, müxtəlif xarakterləri canlandırmaq onun üçün çətin deyil:

"Mən "İvan Qroznı", "Boris Qodunov", hətta "XIV Lüdovik"i oynamışam. Rejissorlar bəzən bu xarakterləri məndə görürlər. İnsanların içində müxtəlif vəziyyətlər mövcuddur. Biz bilmirik, amma hər insanda çox hal var. Sadəcə onu açmaq lazımdır. Ona görə istənilən insan həm kralı, həm qulu, həm cinayətkarı, həm də mükəmməl insanı oynaya bilər. Məsələn, mən Dostoyevskinin "kamil insan" modeli olan knyaz "Mışkin" obrazını da oynamışam. Bu mənə inanılmaz zövq verir".

Telegramda izləyin