"İntihar qərarı adətən sağlam düşüncə ilə verilmir" - AÇIQLAMA

Son illərdə həm dünyada, həm də ölkəmizdə emosional çətinliklərin və psixoloji gərginliyin artması intihar mövzusunu daha çox gündəmə gətirir. İnsan bəzən yaşadığı ağrının dözülməz olduğunu düşünərək "bəlkə də intihar çıxış yoludur" kimi yanlış bir qənaətə vara bilər. Bu, çox ağır və həssas bir sualdır, lakin psixoloqların bu mövzuda verdiyi cavab aydındır: intihar həll yolu deyil, anlıq emosional böhranın yaratdığı daralmış və təhrif olunmuş düşüncənin nəticəsidir.

Psixoloq G.Qədirli bu barədə Sonxeber.az -a açıqlama verib:

"İntihar qərarı adətən sağlam düşüncə ilə verilmir. Depressiya, ağır stress, travma və ya psixoloji yorğunluq insanın qərarvermə bacarığını zəiflədir. Bu vəziyyətdə insanın düşüncəsi "tunel effekti" adlanır: insan yalnız ağrını bitirməyə yönəlir, amma mövcud problemlərin keçici olduğunu və bir çox alternativ çıxış yolu olduğunu görə bilmir. Emosional ağrı insanın gələcəyi haqqında real təsəvvür yaratmasına mane olur və o, sağalma şansını qiymətləndirməkdə çətinlik çəkir.

İntihar problemi aradan qaldırmır, sadəcə insanın həmin problemi həll etmək, vəziyyəti dəyişmək və yenidən qurulmaq imkanını əlindən alır. Halbuki psixoloji böhranlar keçicidir, emosional ağrı azalır, həyat şərtləri dəyişir və insan yardım aldıqca güclənə bilir. Hər bir böhranın psixoloji dəstəklə, yaxın çevrənin yardımı ilə və ya mütəxəssis müdaxiləsi ilə aşılması mümkündür.

İnsan intihar haqqında düşündüyü anda əslində ölmək istəmir — sadəcə yaşadığı ağrıdan qurtulmaq istəyir. Psixologiyada bu, "yaşamaq istəyinin itməməsi, sadəcə ağrıya dözməmək" kimi izah olunur. Bu isə o deməkdir ki, insanın içində yaşamaq enerjisi qalır və ona doğru dəstək göstərilsə, bu enerji yenidən güclənə bilər.

Belə vəziyyətlərdə ən vacib addım susmamaq, paylaşmaq və yardım istəməkdir. Hər bir insan köməyi haqdır və psixoloji dəstək almaq zəiflik deyil — güclü olmaq üçün atılan ilk addımdır. İntihar çıxış yolu deyil; çıxış yolu yaşamaq üçün yeni bir dayaq tapmaq, hissləri bölüşmək və bərpa yoluna qədəm qoymaqdır".

Telegramda izləyin