Qış aylarında göz quruluğu və infeksiyalar artır - Həkimdən xəbərdarlıq

Qış aylarının başlaması ilə soyuq hava, külək və qapalı məkanlarda yaranan quru mühit göz sağlamlığına mənfi təsir göstərməyə başlayıb.

Sonxeber.az türk mediasına istinadən xəbər verir ki, göz xəstəlikləri üzrə mütəxəssis, Dr.Faik Engin Azman bu dövrdə göz quruluğu, infeksiyalar və rəqəmsal ekran istifadəsi ilə bağlı göz yorğunluğunun nəzərəçarpacaq dərəcədə artdığını bildirib.

Qış mövsümünün təkcə hava temperaturuna deyil, eyni zamanda göz sağlamlığına da təsir etdiyini deyən Medipol Universiteti Sefaköy Xəstəxanasının Göz Xəstəlikləri üzrə mütəxəssisi Dr. Faik Engin Azman qeyd edib ki, soyuq hava və insanların qapalı mühitlərdə daha çox vaxt keçirməsi göz quruluğu və infeksiyaların artmasına səbəb olur. Onun sözlərinə görə, qış aylarında göz şikayətləri ilə müraciət edən pasiyentlərin sayı xeyli yüksəlir.

Dr. Azman bildirib ki, qışda göz səthi ətraf mühit amillərinə daha çox məruz qalır:

"Soyuq hava, külək və isitmə sistemlərinin yaratdığı aşağı rütubət göz quruluğu əlamətlərini artırır. Qapalı məkanlarda daha çox vaxt keçirilməsi isə virus və bakterial infeksiyaların yayılmasını asanlaşdırır. Xüsusilə uzun müddət çox adamın olduğu və qapalı yerlərdə olmaq göz soyuqlaması kimi tanınan adenoviral konyunktivitin yayılma tezliyini artırır. Əlləri gözə toxundurmamaq, şəxsi əşyaları ortaq istifadə etməmək, xüsusilə üz dəsmalları və makiyaj vasitələrini ayırmaq infeksiya riskini azaldır. Ekran qarşısında uzun müddət qalmaq rəqəmsal göz yorğunluğuna səbəb olur. Buna görə də müntəzəm fasilələr vermək və vaxtaşırı uzağa baxmaq göz sağlamlığı üçün vacibdir".

Telegramda izləyin