"Gender bərabərliyi sahəsində Azərbaycan kifayət qədər nümunəvi addımlar atmış ölkədir" - DEPUTAT

"Azərbaycan müstəqillik qazandıqdan sonra gender bərabərliyinin təmin olunması istiqamətində çox mühüm işlər görülmüş, əhəmiyyətli uğurlar əldə edilmişdir. Azərbaycan dövlətinin bu sahədə həyata keçirdiyi siyasət, yaradılan institutsional mexanizmlər, qanunvericilik bazası hətta inkişaf etmiş dövlətlərlə eyni səviyyədədir. Azərbaycan Respublikası Konstitusiyasında qadınlarla kişilər arasında bərabərlik prinsipi təsbit edilib və ayrı-seçkiliyin yolverilməzliyi bəyan edilməklə yanaşı, bərabərlik hüququnun pozulması Cinayət Məcəlləsində cinayət əməli kimi müəyyən edilib".

Bu sözləri Sonxeber.az-a Milli Məclisin deputatı Müşfiq Cəfərov danışıb.

O, açıqlamasında qeyd edib ki, hazırda da gender bərabərliyinin təmin edilməsi və qadınların səlahiyyətlərinin genişləndirilməsi ölkə siyasətinin mühüm prioritetlərini təşkil edir:

"Bu, bütün sahə və istiqamətləri əhatə edir. Qadınların iştirakçılığının artırılması üçün imkanların genişləndirilməsi, məşğulluq, sağlamlıq, təhsil və sosial siyasət sahəsində gender bərabərliyinin inkişaf etdirilməsi məqsədilə mühüm işlər görülmüşdür.

Ölkə rəhbəri tərəfindən müxtəlif illərdə qadın məşğulluğunun artırılması, onlar arasında sahibkarlıq fəaliyyətinin dəstəklənməsi, kənd yerlərində qadınların peşə hazırlığının gücləndirilməsi, startapların genişləndirilməsi, uşaq bağçalarının sayının artırılması üzrə tədbirlərin həyata keçirilməsini nəzərdə tutan proqramlar qəbul edilib.

Azərbaycan qadınları kişilərlə bərabər çalışıb və ölkədə qadınlara münasibət həmişə yüksək səviyyədə olub. Bu gün qadınlar ictimai-siyasi həyatda aktiv iştirak edir, onların təhsil və qərar qəbuletmə sistemində iştirakı artır. Bu, göstərir ki, gender bərabərliyi sahəsində Azərbaycan kifayət qədər nümunəvi addımlar atmış ölkədir. Azərbaycan, həmçinin, qadın hüquqlarını tanıyan ilk müsəlman Şərq ölkələrindən biridir".

Vüsalə İbrahimli

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "Gender, ailə və demoqrafiya məsələlərinin işıqlandırılması" mövzusuna uyğun olaraq dərc edilir.

Telegramda izləyin