Azərbaycanın uğurlu xarici siyasəti ölkəmizə olan beynəlxalq etimadı daha da möhkəmləndirir

Aprelin 27-də Azərbaycan Prezidenti İlham Əliyev ilə Çex Respublikasının Baş naziri Andrey Babiş arasında keçirilən görüşlər, aparılan müzakirələr və mətbuata verilən birgə bəyanatlar ölkəmizin müstəqil, balanslı və çoxvektorlu xarici siyasət kursunun növbəti dəfə yüksək səviyyədə nümayişi kimi qiymətləndirilməlidir.
Müasir beynəlxalq münasibətlər sistemində geosiyasi gərginliyin artdığı, qütblərarası ziddiyyətlərin dərinləşdiyi bir dövrdə Azərbaycanın sərgilədiyi müstəqil mövqe xüsusi diqqət çəkir. Rəsmi Bakı heç bir siyasi blokun təsiri altına düşmədən milli maraqlara əsaslanan praqmatik siyasət həyata keçirir və bu yanaşma ölkəmizin beynəlxalq arenada etibarlı tərəfdaş kimi qəbul olunmasını şərtləndirir.
Bu əlaqələr yalnız diplomatik münasibətlərlə məhdudlaşmayaraq, strateji tərəfdaşlıq səviyyəsinə qədər yüksəlib. Ötən illər ərzində qarşılıqlı səfərlər, yüksəksəviyyəli təmaslar və imzalanmış sənədlər bu əməkdaşlığın institusional əsaslarını daha da gücləndirib.
Çex Respublikasının Baş naziri Andrey Babişin rəsmi səfəri ölkəmizə Avropada olan diqqət və marağın növbəti təzahürü kimi dəyərləndirilməlidir. İlk növbədə iki ölkə arasında iqtisadi əlaqələrə nəzər salsaq görərik ki, keçən il 814,73 milyon ABŞ dollarına çatan ticarət dövriyyəsi bu əlaqələrin dinamik inkişafını göstərir. Çexiya Azərbaycanın 6-cı ən böyük ixrac tərəfdaşı olmaqla yanaşı, Avropa İttifaqı daxilində 4-cü yerdə qərarlaşıb. Bu fakt Azərbaycanın Avropa bazarındakı mövqeyinin gücləndiyini nümayiş etdirir.
Ölkələrimizin energetika sahəsində əməkdaşlığı isə xüsusi önəm daşıyır. Azərbaycan Çexiyaya xam neft ixrac edir və 2025-ci ildə bu ölkə İtaliyadan sonra ikinci ən böyük idxalçı olub. Bununla yanaşı, Çexiya tərəfi bərpaolunan enerji, enerji səmərəliliyi və hidrogen sahələrində əməkdaşlıqda maraqlıdır. Bu isə münasibətlərin ənənəvi enerji modelindən daha innovativ istiqamətlərə keçdiyini göstərir.
Aprelin 27-də Qəbələdə Prezident İlham Əliyevin Çexiyanın Baş naziri Andrey Babişlə görüşlərindən sonra ölkə başçısı mətbuata bəyanatında söyləyib ki, " bu gün də ticarət dövriyyəmiz əhəmiyyətli dərəcədə artmışdır, 800 milyon dollardan çoxdur. Amma əgər biz ticarət dövriyyəsinin strukturuna baxsaq görərik ki, burada əsasən Azərbaycan neftinin ixracı gözə dəyir. Ona görə biz ticarət dövriyyəsinin daha tarazlı olmasını və strukturun təkmilləşdirilməsini arzulayırıq".
Bildirilib ki, iki ölkə arasında əməkdaşlığın böyük hissəsi energetika sektoruna aiddir. Burada da uzun illər ərzində Azərbaycan və Çexiya çox etibarlı tərəfdaşlardır. Dövlətimizin başçısı deyib ki, Azərbaycan nefti Çexiyaya ixrac edilir və Çexiyanın enerji balansında önəmli yer tutur.
Bu gün Azərbaycan dünya bazarlarına öz enerji resurslarını ixrac edən etibarlı ölkələr sırasındadır. Bunu, o cümlədən Avropa İttifaqı da qeyd edir və Azərbaycanı etibarlı tərəfdaş kimi qiymətləndirir. Dövlətimizin başçısı qeyd edib ki, bu gün Azərbaycan qazı 16 ölkəyə ixrac edilir və onlardan 10 ölkə Avropa İttifaqına üzv ölkədir. O cümlədən Çexiyaya qonşu olan ölkələrə Azərbaycan təbii qaz ixrac edir.
Hazırda Azərbaycan Çexiyadan hərbi təyinatlı bir çox məhsullar alır və indiki mərhələdə birgə istehsalla bağlı konkret layihələr üzərində danışıqlar gedir. Bu sahənin də çox genişmiqyaslı olacağına əminliyini bildirən dövlətimizin başçısı qeyd edib: "Çünki Azərbaycan öz müdafiə potensialını, o cümlədən yerli istehsal hesabına təmin edir və gələcəkdə bu sahədə böyük təcrübəsi olan Çexiya kimi ölkələrlə bizim müştərək işlərimiz xüsusi önəm daşıyır".
Çexiya Baş nazirinin Azərbaycana səfəri bir daha göstərir ki, Azərbaycan artıq regional deyil, daha geniş coğrafiyada strateji tərəfdaş kimi qəbul olunur, ölkəmizin beynəlxalq sistemdə rolunun gücləndiyini təsdiqləyir.

Həcər Verdiyeva - Tarix elmləri doktoru, professor

Telegramda izləyin