"Delimitasiya prosesində irəliləyiş regionda risklərin azalmasına səbəb ola bilər" - DEPUTAT

"Azərbaycan ilə Ermənistan arasında dövlət sərhədinin delimitasiyası istiqamətində aparılan danışıqlar regionda dayanıqlı sülhün, qarşılıqlı təhlükəsizlik mühitinin formalaşdırılması və münasibətlərin normallaşdırılması baxımından mühüm əhəmiyyət daşıyır. Bu proses çərçivəsində iki ölkənin müvafiq komissiyalarının növbəti görüşlərinin keçirilməsi tərəflər arasında birbaşa dialoqun davam etdiyini, praktiki nəticələrə yönəlmiş yanaşmanın mövcudluğunu və əldə olunan razılaşmaların mərhələli şəkildə irəlilədiyini göstərir".

Bu sözləri Sonxeber.az-a Milli Məclisin deputatı Mahir Süleymanlı danışıb.

O, açıqlamasında qeyd edib ki, son dövrlərdə görüşlərin daha çox sərhəd xəttinə yaxın ərazilərdə təşkili xüsusi diqqət çəkir:

"Bu yanaşma, ilk növbədə, məsələlərin birbaşa müzakirəsi, real coğrafi şəraitin nəzərə alınması və üçüncü tərəflərin iştirakı olmadan ikitərəfli mexanizmlərin gücləndirilməsi baxımından mühüm siyasi əhəmiyyət daşıyır. Bu format region ölkələrinin öz gələcəkləri ilə bağlı qərarları müstəqil şəkildə vermək iradəsini nümayiş etdirir, eyni zamanda qarşılıqlı etimadın möhkəmlənməsinə xidmət edir.

Delimitasiya prosesinin sürətlənməsi, ilk növbədə, təhlükəsizlik mühitinə müsbət təsir göstərə bilər. Dövlət sərhədlərinin qarşılıqlı razılaşma əsasında dəqiq müəyyənləşdirilməsi sərhəd insidentlərinin qarşısının alınmasına, gərginlik risklərinin azalmasına və sabitliyin möhkəmlənməsinə xidmət edir. Bu isə uzun illər davam edən münaqişədən sonrakı mərhələdə etimad quruculuğu üçün vacib şərtlərdən biridir.

Bununla yanaşı, sərhədlərin hüquqi əsaslarla müəyyənləşdirilməsi regionda nəqliyyat və kommunikasiya layihələrinin inkişafı üçün də əlverişli zəmin yaradır. Yeni nəqliyyat xətlərinin açılması, tranzit imkanlarının genişlənməsi və regional bağlantıların güclənməsi Cənubi Qafqazın geoiqtisadi əhəmiyyətini daha da artırır. Xüsusilə Azərbaycanın təşəbbüsü ilə formalaşan beynəlxalq nəqliyyat marşrutları bu baxımdan strateji əhəmiyyət daşıyır və regionun qlobal ticarət əlaqələrində rolunu gücləndirir.

İqtisadi baxımdan sabit və proqnozlaşdırılan təhlükəsizlik mühiti investorlar üçün əsas meyarlardan biridir. Delimitasiya prosesində irəliləyiş regionda risklərin azalmasına, yeni investisiya imkanlarının yaranmasına və iqtisadi əməkdaşlıq perspektivlərinin genişlənməsinə səbəb ola bilər. Bu isə həm ölkələrarası ticarət dövriyyəsinin artmasına, həm də ümumi regional rifahın yüksəlməsinə xidmət edər.

Nəticə etibarilə, delimitasiya prosesi təkcə sərhəd xəttinin müəyyən olunması deyil, bütövlükdə Cənubi Qafqazda yeni əməkdaşlıq modelinin formalaşmasına aparan strateji mərhələdir. Bu proses nə qədər ardıcıl, hüquqa əsaslanan və qarşılıqlı hörmət şəraitində davam etsə, regionda uzunmüddətli sabitlik, iqtisadi inkişaf və sülh perspektivləri bir o qədər möhkəm olacaqdır".

Telegramda izləyin