Rəqəmsal ödənişlər xərcləri artırır, yoxsa sadəcə rahatlıq yaradır? - AÇIQLAMA

Son illərdə ödəniş vərdişlərində ciddi dəyişikliklər müşahidə olunur. Nağd pul istifadəsi azalarkən, bank kartları və rəqəmsal ödənişlər gündəlik xərcləmələrin əsas vasitəsinə çevrilir. Bəs, nağd puldan istifadə ilə müqayisədə kartla və rəqəmsal ödənişlər daha çox xərcləməyə səbəb olurmu, yoxsa bu yalnız insanların maliyyə davranışını idarə etmə tərzi ilə bağlıdır?

Mövzu ilə bağlı Sonxeber.az-a iqtisadçı ekspert Natiq Cəfərli danışıb.

O, açıqlamasında qeyd edib ki, rəqəmsal və onlayn ödənişlər artıq dünyada çoxdan populyardır:

"Bəzi ölkələrdə nəğd ödənişlər ümumi ticarət dövriyyəsinin cəmi 10-15 faizini belə keçmir. Bizdə də bu sahə sürətlə inkişaf edir. Son illərdə kartla ödənişlərin həcmi xeyli artıb. Bunun əsas səbəbi isə bu ödənişlərin daha rahat olmasıdır. Yəni, artıq cibdə nəğd pul daşımağa ehtiyac qalmır və demək olar ki, hər yerdə POS-terminallar mövcuddur.

Bundan əlavə, mobil bankçılıq vasitəsilə kommunal xidmətlər, internet və digər ödənişləri də rahatlıqla telefonla həyata keçirmək mümkündür. Ümumilikdə, rəqəmsal ödəniş alətlərinin geniş istifadəsi nəğd pula tələbatı azaldır və bu da insanların gündəlik həyatını daha rahat edir".

Vüsalə İbrahimli

Telegramda izləyin