Azərbaycan Mərkəzi Asiya ilə ödəniş sistemlərini birləşdirir - Sahibkarları nə gözləyir? - İQTİSADÇIDAN AÇIQLAMA

Azərbaycanın Mərkəzi Asiya ölkələri ilə iqtisadi və maliyyə əlaqələrinin genişləndirilməsi istiqamətində yeni addımlar atılır. Beş ölkənin - Azərbaycan, Qazaxıstan, Qırğızıstan, Özbəkistan və Tacikistanın milli ödəniş sistemlərinin inteqrasiyası nəzərdə tutulur. Bu təşəbbüsün reallaşması ilə sərhədlərarası pul köçürmələrinin və ticarət əməliyyatlarının daha sürətli, əlçatan və ucuz başa gəlməsi gözlənilir. Xüsusilə QR-kod vasitəsilə ödəniş imkanlarının genişləndirilməsi həm vətəndaşlar, həm də sahibkarlar üçün yeni imkanlar yarada bilər. Bəs bu inteqrasiya Azərbaycan sahibkarlarına konkret olaraq nə qazandıracaq?

Xarici tərəfdaşlarla ticarət aparan şirkətlərin bank xərcləri azalacaqmı? Kiçik və orta sahibkarlıq subyektləri Mərkəzi Asiya bazarlarına daha asan çıxış əldə edə biləcəklərmi? Yeni sistem milli biznesin rəqabət qabiliyyətinə və ölkəyə investisiya axınına necə təsir göstərəcək?
Mövzu ilə bağlı Liberal İqtisadçılar Mərkəzinin sədri Akif Nəsirli Sonxeber.az-a açıqlamasında bildirdi ki, Azərbaycanın Mərkəzi Asiya ölkələri ilə ödəniş sistemlərini birləşdirməsi ilk növbədə sahibkarlar üçün maliyyə əməliyyatlarını asanlaşdıracaq və ticarət əlaqələrinin genişlənməsinə imkan yaradacaq. Hazırda müxtəlif ölkələrlə işləyən sahibkarlar beynəlxalq ödənişlər zamanı əlavə bank prosedurları, komissiyalar və vaxt itkisi ilə üzləşirlər. Ödəniş sistemlərinin inteqrasiyası bu maneələri azaltmağa, pul köçürmələrini daha sürətli və daha ucuz həyata keçirməyə şərait yarada bilər.

Bu, xüsusilə Mərkəzi Asiya ölkələri ilə idxal-ixrac əməliyyatları aparan kiçik və orta sahibkarlar üçün əhəmiyyətlidir. Çünki iri şirkətlərin beynəlxalq maliyyə əməliyyatları aparmaq imkanları daha genişdir, kiçik sahibkarlar isə əlavə komissiyalara və mürəkkəb prosedurlara daha həssasdırlar. Ödənişlərin sadələşdirilməsi onların bazara çıxış imkanlarını genişləndirə bilər.

Digər tərəfdən, bu inteqrasiya Azərbaycanı regionun maliyyə və ticarət əlaqələrində daha fəal iştirakçıya çevirə bilər. Lakin bunun real iqtisadi faydaya çevrilməsi üçün təkcə texniki inteqrasiya kifayət deyil. Ödənişlərin təhlükəsizliyi, valyuta konvertasiyası, məzənnə riskləri və bank xidmətlərinin əlçatanlığı da təmin olunmalıdır. Əsas nəticə sahibkarların xərclərinin azalması, hesablaşmaların sürətlənməsi və qarşılıqlı ticarətin genişlənməsi olmalıdır.

Müəllif: İlkin Məmmədkərimov

Telegramda izləyin