Dünyanın ən uzun çayında niyə körpü yoxdur? - 2 əsas səbəb

Dünyanın ən uzun çayı olan Amazon çayı Peru, Kolumbiya və Braziliya ərazisindən keçərək təxminən 6400 kilometr uzanır. Təəccüblü olsa da, bu çayın üzərində rəsmi olaraq heç bir körpü yoxdur.

Qaynarinfo xəbər verir ki, bu barədə ng.24.hu saytı yazır.

Sürixdəki İsveçrə Federal Texnologiya İnstitutunun nümayəndəsi Valter Kaufmanın sözlərinə görə, əsas səbəb tələbin olmamasıdır. Amazon hövzəsinin böyük hissəsi çox seyrək məskunlaşıb, infrastruktur zəif inkişaf edib və bir çox bölgədə ümumiyyətlə yollar yoxdur. Buna yaxşı nümunə olaraq Makapa şəhəri göstərilir - yüz minlərlə insanın yaşadığı bu şəhərə Braziliyanın digər bölgələrindən quru yollarla getmək mümkün deyil və əsas nəqliyyat yolu çayın özüdür.

İkinci səbəb isə mühəndislik baxımından çətinliklərdir. Yağış mövsümündə Amazon çayının səviyyəsi 9 metrə qədər qalxa bilir, eni isə bir neçə kilometrdən onlarla kilometrə qədər dəyişir. Bundan əlavə, çayda bitki örtüyü ilə örtülü "matupa" adlanan böyük üzən adalar hərəkət edir və bu da istənilən körpü üçün ciddi təhlükə yaradır.

Cəngəlliyin özü də tikinti üçün əlverişli deyil: yumşaq və qeyri-sabit torpaq, sıx bitki örtüyü və güclü yağışlar infrastrukturu sürətlə sıradan çıxarır.

Bununla belə, Amazonun əsas axarında körpü olmasa da, onun ən böyük qolu olan Rio-Negro üzərində körpü mövcuddur. Manaus yaxınlığında yerləşən bu körpü Felipi Dau adlı jurnalistin adını daşıyır.

Mütəxəssislər həmçinin ekoloji riskləri də vurğulayırlar: Amazon regionunda meşələrin 95%-i yolların yaxınlığında məhv edilir, çünki yollar ağac kəsimi və sənaye fəaliyyətinə çıxış yaradır. Buna görə bir çox alim hesab edir ki, Amazon çayı uzun müddət körpüsüz qala bilər.

Telegramda izləyin