Fransada 6,2 milyon dollarlıq "divara yapışdırılmış banan" oğurlandı

Fransanın Mets şəhərində yerləşən Centre Pompidou Muzeyində sərgilənən və dəyəri təxminən 6,2 milyon dollar olan "Divara yapışdırılmış banan" adlı sənət əsəri oğurlanıb.

Sonxeber.az xarici mediaya istinadla xəbər verir ki, hadisə muzeyin mühafizə əməkdaşlarından birinin eksponatın bir hissəsi olan bananın yerində olmadığını aşkar etməsindən sonra üzə çıxıb. Məlumat əsasında muzeyə gələn polis əməkdaşları hadisə ilə bağlı araşdırmalara başlayıblar.

Muzey rəhbərliyi oğurluq faktı ilə bağlı hüquq-mühafizə orqanlarına müraciət etdiyini açıqlayıb. Bildirilib ki, əsərin tərkib hissəsi olan banan qısa müddət ərzində yenisi ilə əvəzlənib və eksponat yenidən ziyarətçilərin nümayişinə təqdim olunub.

İtaliyalı rəssam Maurizio Cattelan tərəfindən yaradılan və "Komediya" adlanan əsər ilk dəfə Art Basel Miami sərgisində nümayiş etdirilmiş, daha sonra bütün dünyada geniş müzakirələrə səbəb olmuşdu.

Gümüşü rəngli yapışqan lentlə divara bərkidilmiş bir banandan ibarət olan əsər müasir incəsənətin ən mübahisəli nümunələrindən biri hesab edilir. Əsərin üç nüsxəsindən ikisi 120 min dollara satılıb, üçüncü nüsxə üçün isə 150 min dollar qiymət müəyyənləşdirilmişdi.

Satirik üslubu ilə tanınan Maurizio Cattelanın əsərləri daha əvvəl də qeyri-adi hadisələrlə gündəmə gəlib. Rəssamın 18 karat qızıldan hazırladığı və "America" adlandırdığı unitaz formasındakı sənət əsəri 2019-cu ildə İngiltərədəki Blenheim Palace sarayından oğurlanmış və uzun müddət beynəlxalq medianın diqqət mərkəzində qalmışdı.

Telegramda izləyin