Alınan məhsul qüsurlu çıxarsa, istehlakçının hansı hüquqları var? - AÇIQLAMA

Gündəlik həyatda istehlakçıların ən çox qarşılaşdığı problemlərdən biri aldıqları məhsulun qüsurlu və ya yararsız çıxmasıdır.

Bəzən vətəndaşlar belə hallarda öz hüquqlarını bilmədikləri üçün məhsulu geri qaytara və ya dəymiş zərərin əvəzini tələb edə bilmirlər.

Bəs Azərbaycan qanunvericiliyinə görə qüsurlu məhsul alan istehlakçının hansı hüquqları var?

Hüquqşünas Xanım Yusifova bu barədə Sonxeber.az -a açıqlama verib:

"Azərbaycan Respublikasının ‘İstehlakçıların hüquqlarının müdafiəsi haqqında’ Qanununa əsasən, istehlakçı aldığı məhsulda istehsal, keyfiyyət və ya digər qüsurlar aşkar etdikdə bir sıra hüquqlara malikdir.

İlk növbədə istehlakçı satıcıdan həmin məhsulun eyni markalı və ya analoji məhsulla dəyişdirilməsini tələb edə bilər. Bundan əlavə, məhsulun qüsurunun aradan qaldırılmasını, qiymətin uyğun məbləğdə azaldılmasını və ya ödənilmiş pulun tam şəkildə geri qaytarılmasını tələb etmək hüququna malikdir.

Əgər məhsul üçün zəmanət müddəti müəyyən edilibsə və qüsur həmin müddət ərzində aşkarlanıbsa, satıcı və ya istehsalçı məsuliyyət daşıyır. Satıcı məhsulun qüsurunun istehlakçının düzgün istifadə etməməsi nəticəsində yarandığını sübut etmədiyi halda, istehlakçının tələblərini təmin etməlidir.

İstehlakçı məhsulu alarkən verilmiş qəbzi saxlamalıdır. Lakin qəbzin olmaması avtomatik olaraq hüquqların itirilməsi demək deyil. Digər sübutlarla da alış faktını təsdiqləmək mümkündür.

Əgər satıcı qanuni tələbləri yerinə yetirməkdən imtina edərsə, istehlakçı əvvəlcə yazılı qaydada müraciət edə, nəticə əldə olunmadığı halda isə aidiyyəti dövlət orqanlarına və ya məhkəməyə müraciət edərək öz hüquqlarının müdafiəsini tələb edə bilər.

Qanunvericiliyin əsas məqsədi istehlakçının keyfiyyətli və təhlükəsiz məhsulla təmin olunmasını qorumaqdır. Buna görə də vətəndaşlar qüsurlu məhsulla qarşılaşdıqda hüquqlarını bilməli və qanunla nəzərdə tutulmuş imkanlardan istifadə etməlidirlər".

Telegramda izləyin