Dünyada xərçəng xəstələrinin sayı ikiqat arta bilər - HESABAT

Ümumdünya Səhiyyə Təşkilatı xərçəng hallarının sürətlə artdığını açıqlayıb.

Lent.az xarici mediaya istinadən bildirir ki, yeni qlobal hesabata görə, profilaktika, erkən aşkarlama və müalicə yaxşılaşdırılmadıqda, 2050-ci ilə qədər yeni xərçəng hallarının illik sayı təxminən 35 milyona çata bilər.

Hesabatda qeyd olunur ki, xərçəng dünyada ölümün əsas səbəblərindən biri olaraq qalır. ÜST-ün məlumatına görə, hər il təxminən 20,6 milyon insana bu xəstəlik diaqnozu qoyulur və təxminən 10 milyon insan bundan ölür. Bu o deməkdir ki, xəstəlik gündə 26 mindən çox insanın həyatına son qoyur. Xərçəng ürək-damar xəstəliklərindən sonra ölümün ikinci əsas səbəbidir.

Hesabatın müəllifləri bir çox ölkələrdə profilaktika, diaqnoz, müalicə və palliativ yardıma çıxışda bərabərsizliyin davam etdiyini və genişləndiyini vurğulayırlar.

Misal üçün, yüksək gəlirli ölkələrdə döş xərçəngi olan qadınların beş illik sağ qalma nisbəti təxminən 87 faiz, aşağı gəlirli ölkələrdə isə təxminən 42 faiz təşkil edir. Bundan əlavə, ölkələrin üçdə birindən azı xərçəng müalicəsini universal səhiyyə əhatə dairəsinə daxil edib.

ÜST-ün baş direktoru Tedros Adhanom Qebreyesus bildirib ki, xərçənglə mübarizə milli səhiyyə sistemləri üçün prioritet olmalıdır.

"Xərçəng insanın harada doğulduğuna, nə qədər qazandığına və ya səhiyyə xidmətlərinə çıxışı olub-olmadığına görə ölüm hökmü olmamalıdır", - o vurğulayıb.

ÜST qeyd edir ki, vəziyyət yalnız hərtərəfli yanaşma ilə dəyişdirilə bilər. Əsas tədbirlərə tütün və alkoqol istifadəsinin azaldılması, xərçəngə səbəb olan viruslara qarşı peyvənd edilməsi, piylənmə ilə mübarizə, skrininq proqramlarının hazırlanması, vaxtında diaqnozun təmin edilməsi və xəstələrə müasir müalicə və dəstəkləyici qayğının göstərilməsi daxildir.

Telegramda izləyin