Diyetoloq bal haqqında əsas yanlış təsəvvürü TƏKZİB EDİB

"Bal hər kəs üçün uyğun deyil və prinsip etibarilə şəkərin sağlam alternativi hesab edilməməlidir".

Oxu.Az xəbər verir ki, bunu diyetoloq Maryana Cutova bildirib.

O, balla bağlı əsas yanlış təsəvvürlərdən birini təkzib edib.

Diyetoloqun sözlərinə görə, balın tərkibində faydalı bitki birləşmələri olsa da, bu maddələr müntəzəm olaraq həddindən artıq qidalanma nəticəsində qəbul edilən artıq kaloriləri kompensasiya etmir.

O izah edib ki, balın tərkibində qlükoza, fruktoza və saxaroza kimi "sərbəst şəkərlər" kifayət qədər çoxdur. Ümumdünya Səhiyyə Təşkilatının tövsiyələrinə əsasən, bu şəkərlərin qida rasionundakı miqdarı gündəlik enerji qəbulunun 10 faizini keçməməlidir.

Sağlam yetkin insan üçün bal başqa şirin məhsulu əvəz edirsə, kiçik porsiya, məsələn, bir çay qaşığı kifayət edə bilər. Diyetoloq vurğulayıb ki, balın hər kəs üçün uyğun olan universal "müalicəvi dozası" yoxdur.

"Şəkərli diabet, prediabet, insulin dirənci, piylənmə və qaraciyərin piylənməsi zamanı balı rasiondan çıxarmaq daha yaxşıdır. Bunu etmək mümkün deyilsə, bal şəkər, mürəbbə və ya şərbət kimi nəzərə alınmalıdır. Balı onsuz da şirin olan qida rasionuna əlavə etmək, məsələn, desertlə birlikdə yemək və ya şirin içki ilə qəbul etmək xüsusilə arzuolunmazdır", - deyə Cutova xəbərdarlıq edib.

O, həmçinin pollinozdan əziyyət çəkən insanları baldan istifadə ilə bağlı xəbərdar edib. Diyetoloq vurğulayıb ki, bal toz allergiyasını müalicə etmir və mövsümi burun axmasına qarşı təhlükəsiz "peyvənd" rolunu oynamır.

Əksinə, onun sözlərinə görə, çiy balın tərkibində toz hissəcikləri və arıçılıq məhsullarının digər komponentləri ola bilər. Buna görə həssas insanlarda bal qəbulundan sonra ağız boşluğunda qaşınma, dodaqlarda şişkinlik və ya mövsümi allergiya əlamətlərinin güclənməsi mümkündür.

Telegramda izləyin