Borc verən şəxs pulunu geri tələb edərkən mesajlaşmalara əsaslana bilərmi? - AÇIQLAMA

Gündəlik həyatda insanlar bir-birinə borc verərkən çox vaxt rəsmi müqavilə bağlamır, pulun verilməsi ilə bağlı yazılı sənəd də tərtib etmir.

Tərəflər arasında aparılan WhatsApp, Telegram və digər messencer yazışmaları isə bəzən borcun mövcudluğunu təsdiqləyən yeganə material olur.

Bəs belə yazışmalar məhkəmədə sübut kimi qəbul edilə bilərmi? Borc verən şəxs pulunu geri tələb edərkən yalnız mesajlaşmalara əsaslana bilərmi?

Hüquqşünas Xanım Yusifova bu barədə Sonxeber.az -a açıqlama verib:

"Bəli, tərəflər arasında aparılan elektron yazışmalar müəyyən hallarda borcun mövcudluğunu təsdiqləyən sübut kimi məhkəməyə təqdim edilə bilər. Lakin yalnız yazışmanın mövcud olması avtomatik olaraq borcun məhkəmə tərəfindən təsdiq ediləcəyi anlamına gəlmir.

Məsələn, borc alan şəxsin yazışmada "səndən 2 000 manat götürmüşəm", "borcumu gələn ay qaytaracağam" və ya "pulu qaytarmağa imkanım olmadı" kimi ifadələr işlətməsi borc münasibətinin mövcudluğunu göstərən mühüm sübutlardan biri ola bilər. Bununla yanaşı, məhkəmə həmin yazışmanın həqiqiliyini, kimlər arasında aparıldığını və məzmununu digər sübutlarla birlikdə qiymətləndirir.

Xüsusilə pulun faktiki olaraq qarşı tərəfə verildiyini təsdiqləyən bank köçürməsi, kartdan karta ödəniş, ödəniş qəbzi və digər maliyyə sənədlərinin olması borcun sübut edilməsini əhəmiyyətli dərəcədə gücləndirir.

Həmçinin yazışmaların sonradan dəyişdirilməsi və ya saxtalaşdırılması ilə bağlı şübhə yaranarsa, onların həqiqiliyinin müəyyən edilməsi məsələsi də ortaya çıxa bilər. Buna görə də borc münasibətlərində təkcə mesajlaşmaya güvənməkdənsə, mümkün qədər yazılı borc müqaviləsinin bağlanması və pulun verilməsini təsdiq edən sənədlərin saxlanılması daha təhlükəsizdir.

Yəni messencer yazışmaları məhkəmədə əhəmiyyətli sübut ola bilər, amma onların hüquqi qüvvəsi konkret işin hallarından və digər mövcud sübutlardan asılıdır"

Telegramda izləyin