Kirayə mənzil seçərkən vətəndaşlar nələrə diqqət etməlidir? - EKSPERT AÇIQLAMA

Azərbaycanda kirayə mənzil bazarı mövsümi amillər, tələb-təklif balansına və Dövlət Vergi Xidməti tənzimləmələrinə uyğun olaraq dinamik dəyişir. Xüsusilə paytaxt Bakıda avqust və sentyabr aylarında tələbə axını səbəbindən aktivlik və qiymət artımı müşahidə olunur. Kirayə bazarındakı yeni tendensiyalar nələrdir və vətəndaşlar seçim edərkən nələrə diqqət etməlidir?

Məsələ ilə bağlı Sonxeber.az-a açıqlama verən əmlak məsələləri üzrə ekspert Ramil Osmanlı suallara aydınlıq gətirdi:

Ekspert söyləyib ki, kirayə mənzil bazarındakı ümumi tendensiyanın yaranmasında bir sıra səbəblər var və bu səbəblər konkret mövsümlə və yaxud illə bağlı məsələ deyil:

"Bu artıq illərdir ki davam edən və dəyişməz olaraq qalan bir prosesin mən deyərdim ki kuliminasıyası olmasa da, müəyyən mərhələsidir. Çünki həm makro iqtisadi,həm inzibati təsirlər nəticəsində Azərbaycanda kirayə mənzil bazarında təklif portfelinin məhdudlaşması, daralması ,tələbin isə yüksək olması müşahidə olunur. Bu prosesin tərkibində şəhərsalma nəticəsində, bir də köhnə ucuz kirayə fondunun sıradan çıxması və onların yerinə daha yeni, daha bahalı kirayə mənzil fondunun daxil olması tendensiyası müşahidə olunur. Qeyd etdiyim səbəblərin hamısı bazarda təbii ki, qiymət artımına təsir göstərən amillərdir"

Ekspertin sözlərinə görə, paralel olaraq şəhərsalma nəticəsində müəyyən dövrlərdə 200, 300, 500, 1000, 2000 nəfərlik yeni tələb formalaşdırma prosesi də müşahidə olunur:

"Belə ki məsələn bir şirkət bir ərazini alır, tutaq ki "Sovetski"ni, "Kubinka"nı və sair ərazini alır, həmin ərazidə vətəndaşlara kirayə pulu ödənilir, vətəndaşlar da o ərazilər üzrə aldıqları kirayə pulu ilə bazardan təbii ki mənzil kirayələyirlər. Hamısı olmasa da, 70-80 faizi yenidən bazara daxil olur. Bütün bu səbəblər kirayə mənzil bazarında qiymətlərin cib yandırmasına gətirib çıxarır"

Bu proses nə qədər davam edəcək? sualımıza isə cavab olaraq ekspert vurğulayıb ki, bu prosesin tam olaraq bu sahəyə sahibkarları cəlb edənə qədər, alternativ fondlar yaradılana qədər davam edəcək.

Lalə Məmmədova

Telegramda izləyin