Azərbaycan-Özbəkistan münasibətləri iki ölkə rəhbərinin iradəsinə söykənir - AÇIQLAMA

Prezident İlham Əliyevin Özbəkistanın Milli İnformasiya Agentliyinə müsahibəsində Azərbaycan-Özbəkistan münasibətlərini müttəfiqlik səviyyəsində xarakterizə etməsi və Mərkəzi Asiya ilə əlaqələrin genişləndirilməsini vurğulaması regionda əməkdaşlığın strateji əhəmiyyətinin artdığını göstərir. Azərbaycan və Mərkəzi Asiya ölkələri arasında nəqliyyat, enerji, investisiya və siyasi əməkdaşlığın genişlənməsi, xüsusilə Orta Dəhlizin inkişafı Bakı üçün yeni imkanlar yaradır.

Azərbaycan-Özbəkistan və bütövlükdə Mərkəzi Asiya ilə əlaqələrin güclənməsi ölkəmizin regional və beynəlxalq mövqeyinə hansı siyasi və iqtisadi üstünlükləri qazandırır?
Sonxeber.az-a açıqlama verən siyasi ekspert Aydın Quliyev bildirib ki, bu gün Azərbaycan və Özbəkistan münasibətlərinin inkişafı həm iki ölkənin maraqları baxımından olduqca əhəmiyyətlidir, həm də Azərbaycan-Özbəkistan əməkdaşlığı bütövlükdə Mərkəzi Asiya-Azərbaycan əməkdaşlığına önəmli təsir göstərir.

"Özbəkistan Mərkəzi Asiyanın ən böyük iqtisadiyyata və böyük potensiala malik ölkəsidir. Özbəkistanın və Azərbaycanın iqtisadiyyatları bir-birinə yaxındır. Hər iki ölkə müasir dünyada haqlı olaraq orta güclər kimi dəyərləndirilir. Hər iki ölkə malik olduğu imkanlardan ağıllı istifadə etməklə bu gün dünya proseslərinə müəyyən səviyyədə təsir göstərən dövlətlərə çevrilib. Azərbaycan-Özbəkistan əməkdaşlığı hərtərəfli xarakter daşıyır. Azərbaycan Prezidentinin Özbəkistan mediasına verdiyi mesajlar həm Azərbaycanla Özbəkistan arasında ikitərəfli əlaqələrin bundan sonrakı inkişaf istiqamətlərini müəyyənləşdirmək baxımından əhəmiyyətlidir, həm də bu əlaqələrin bütövlükdə Mərkəzi Asiya-Azərbaycan əməkdaşlığının dərinləşməsində nə qədər önəmli rol oynadığını göstərir".

Ekspert bildirib ki, Azərbaycanla Özbəkistan arasında münasibətlər iki ölkə rəhbərinin iradəsinə və aydın strategiyasına söykənir:

"İki ölkə arasında ticarət-iqtisadi əməkdaşlığın həcmi az qala 1 milyarda yaxınlaşır ki, bu da kiçik rəqəm deyil. Amma nəzərə alsaq ki, hər iki ölkənin ticarət-iqtisadi əməkdaşlığı genişləndirmək üçün hələ böyük imkanları var, bu sahədə daha ciddi nəticələr əldə etmək mümkündür. Özbəkistan həm sənaye, həm kənd təsərrüfatı, həm də təbii qazıntı məhsullarının emalı ilə məşğul olan qabaqcıl ölkə kimi Azərbaycanla əməkdaşlığını qurmaqda düzgün strategiya müəyyənləşdirib. Özbəkistanın Azərbaycanın işğaldan azad olunmuş ərazilərinin bərpasında da xüsusi iştirakı var. Azərbaycan Prezidentinin müsahibəsində toxunulan bu məqam Türk dövlətlərinin inteqrasiyasında Azərbaycanın işğaldan azad olunmuş ərazilərinə birlikdə göstərilən qayğının nə qədər əhəmiyyətli olduğunu təsdiqləyir".

Onun sözlərinə görə, eyni zamanda, Azərbaycan və Özbəkistan əlaqələrinin inkişafı Mərkəzi Asiyanın vahid bir məkana çevrilməsində də öz rolunu oynayır:

"Təsadüfi deyil ki, müsahibədə mühüm mesajlardan biri məhz Mərkəzi Asiyanın daha möhkəm və inteqrasiya olunmuş geosiyasi məkana çevrilməsi istiqamətində atılan addımların əhəmiyyətinin qeyd edilməsidir. Verilən mesajlar Mərkəzi Asiyanın vahid geosiyasi məkana çevrilməsində Azərbaycanla əlaqələrin gücləndirilməsi istiqamətində bundan sonra görüləcək işlər barədə də aydın təsəvvür yaradır. Xüsusilə Azərbaycan-Özbəkistan əməkdaşlığının yaşıl enerji ixracı istiqamətində böyük potensialı var. Bir-iki il əvvəl imzalanmış saziş də Azərbaycanın, Qazaxıstanın və Özbəkistanın istehsal etdikləri və edəcəkləri yaşıl enerjinin dünya bazarlarına çıxarılması kimi böyük perspektivin hədəfləndiyini göstərir. Bir sözlə, Azərbaycan-Özbəkistan əməkdaşlığı dinamik inkişaf edir və hərtərəfli inkişaf prosesindədir. İki ölkə arasında iqtisadi və ticarət əlaqələrinin inkişafı təbii ki, mədəni və humanitar münasibətlərə də öz təsirini göstərir".

Röyalə Xəyal

Telegramda izləyin