Bu təltif Azərbaycan-Özbəkistan münasibətlərinə verilən mühüm siyasi qiymətdir - Deputat

Özbəkistan Prezidenti Şavkat Mirziyoyevin Azərbaycan Prezidenti İlham Əliyevi "Ali Dostluq Dərəcəsi" ordeni ilə təltif etməsi iki ölkə arasında münasibətlərin strateji və müttəfiqlik xarakterinin daha da möhkəmləndiyini göstərən siyasi jest kimi qiymətləndirilə bilər. Təltifin əsaslandırılmasında Azərbaycan-Özbəkistan arasında strateji tərəfdaşlıq və müttəfiqlik əlaqələrinin inkişafına, siyasi, iqtisadi və humanitar əməkdaşlığın genişlənməsinə töhfələr xüsusi qeyd olunub.

Bəs, bu təltif iki ölkə arasında strateji tərəfdaşlıq və müttəfiqlik münasibətlərinə verilən siyasi qiymət kimi necə dəyərləndirilə bilər və Azərbaycan-Özbəkistan əlaqələrinin gələcək inkişafına hansı təsirləri göstərə bilər?

Sonxeber.az-a açıqlama verən Milli Məclisin deputatı Elçin Mirzəbəyli bildirib ki, bu təltif Azərbaycan-Özbəkistan münasibətlərinin yüksək səviyyəsinə verilən mühüm siyasi qiymətdir.

"Prezident İlham Əliyevin Özbəkistanın "Ali Dostluq Dərəcəsi" ordeni ilə təltif olunması onun iki ölkə arasında dostluq, strateji tərəfdaşlıq və müttəfiqlik əlaqələrinin inkişafındakı rolunun qardaş ölkə tərəfindən yüksək qiymətləndirildiyini göstərir. Təltifin məhz "Əbədi dostluq haqqında Müqavilə"nin imzalandığı və münasibətlərin yeni mərhələyə keçdiyi bir vaxtda baş verməsi onun siyasi əhəmiyyətini daha da artırır. Müqavilədə qarşılıqlı etimad, suverenliyə və təhlükəsizliyə hörmət, iqtisadi və humanitar əməkdaşlığın genişləndirilməsi kimi əsas prinsiplər təsbit olunur".

Deputat bildirib ki, bu baxımdan ordeni Azərbaycan-Özbəkistan münasibətlərinin strateji xarakterinə verilən siyasi mesaj kimi dəyərləndirmək olar.

"Daha dəqiq desək, bu, iki ölkənin mövcud müttəfiqliyi qorumaqla kifayətlənmədiyini, onu gələcəyə hesablanmış daha möhkəm siyasi və mənəvi təmələ çevirmək niyyətini göstərir".

Röyalə Xəyal

Telegramda izləyin