Bu, söz xatirinə verilən bir qiymət deyil - AÇIQLAMA

Prezident İlham Əliyevin Özbəkistan Prezidenti Şavkat Mirziyoyevə "Heydər Əliyev" ordenini təqdim etməsi iki ölkə arasında münasibətlərin yüksək səviyyəsinin göstəricisi kimi qiymətləndirilə bilər. Təltifin məhz Azərbaycan-Özbəkistan dostluq, qardaşlıq və müttəfiqlik əlaqələrinin inkişafına verilən qiymət kimi təqdim olunması da diqqət çəkir.

Bəs, bu təltif Azərbaycan-Özbəkistan münasibətlərinin strateji tərəfdaşlıq və müttəfiqlik səviyyəsinə verilən siyasi qiymət kimi necə dəyərləndirilə bilər və iki ölkə arasında əlaqələrin gələcək inkişafına hansı təsirləri göstərə bilər?

Sonxeber.az-a açıqlama verən politoloq Samir Hümbətov bildirib ki, Azərbaycan Prezidentinin Özbəkistana artıq son beş ildə iki rəsmi səfəri və dörd işgüzar səfəri baş tutub. Təbii ki, Azərbaycan-Özbəkistan münasibətləri digər ölkələrlə müqayisədə daha yüksək səviyyədə inkişaf edir.

"Xüsusilə nəzərə alsaq ki, Özbəkistan Azərbaycan torpaqları işğaldan azad edildikdən sonra Qarabağda məktəb tikməklə bu prosesə ilk başlayan ölkələrdən biri oldu. Bu addım digər dövlətlər üçün də örnək və nümunəvi addım hesab edilə bilər. Bu gün Özbəkistan Prezidenti Şavkat Mirziyoyevin "Heydər Əliyev" ordeni ilə təltif edilməsi onun Azərbaycanın ən yüksək dövlət ordenlərindən birinə layiq görüldüyünü göstərir. Bu, söz xatirinə verilən bir qiymət deyil və əslində ikitərəfli münasibətlərin inkişafına müsbət təsir göstərən mühüm amildir".

Politoloq bildirib ki, Azərbaycan-Özbəkistan münasibətlərini iqtisadi və siyasi sahələrlə yanaşı, regional və qlobal təhlükəsizlik, nəqliyyat-kommunikasiya, mədəni və digər istiqamətlərdə də qiymətləndirmək mümkündür:

"Məsələn, qarşıya qoyulan əsas hədəflərdən biri ölkələr arasında ticarət dövriyyəsinin təxminən 1 milyard dolların üzərinə çatdırılmasıdır. Son beş ildə bu istiqamətdə çox ciddi sıçrayış baş verib və bu, böyük uğurdur. Bu, təbii ki, həm Şavkat Mirziyoyevin Özbəkistan tərəfindən, həm də İlham Əliyevin Azərbaycan tərəfindən atdığı addımların praktiki nəticəsi kimi qiymətləndirilə bilər".

Onun sözlərinə görə, dostluq münasibətləri, strateji tərəfdaşlıq və müttəfiqlik əlaqələrinin uzunmüddətli və davamlı çərçivəyə salınması onu göstərir ki, hər iki xalq dini, dili, milli mənsubiyyəti, tarixi keçmişi və gələcəyə baxışı baxımından bir-birinə çox yaxındır:

"Buna görə də bütün bunlar təkcə dövlətlərarası münasibətlərə deyil, xalqlar arasındakı əlaqələrə də müsbət təsir göstərəcək amillərdir. Düşünürəm ki, istənilən platformada və istənilən istiqamətdə Azərbaycan və Özbəkistanın tutduğu strateji xətt hər iki ölkənin maraqlarına və mənafeyinə xidmət edə bilər".

Röyalə Xəyal

Telegramda izləyin