Moskva Londona xəbərdarlıq etdi: " Atəşlə oynayırsınız" AÇIQLAMA

Rusiya Xarici İşlər Nazirliyinin sözçüsü Mariya Zaxarova Britaniyanı sərt şəkildə hədələyib. O bildirib ki, Ukraynanın Britaniya silahlarından istifadə etməklə Rusiyaya zərbələri davam edərsə, Ukraynada və onun hüdudlarından kənarda Britaniyaya məxsus hərbi obyektlər və texnika hədəfə alına bilər. Zaxarova həmçinin Londonu "fəlakətli nəticələr" barədə xəbərdar edib. O, bu fikirləri 27 avqust 2026-cı ildə keçirilən Rusiya XİN brifinqində səsləndirib.

Mövzu ilə bağlı politoloq Məhəmməd Əsədullazadə Sonxeber.az-a açıqlama verib:

"Böyük Britaniyanın Ukraynaya verdiyi pualarla Rusiyanın dərinliklərində strateji obyektləri vurması artıq Moskvanın da Böyük Britaniyaya eyni cavab addımı atacaqlarını göstərir. Hətta, ABŞ Mərkəzi Kəşfiyyat İdarəsinin rəisi də məhz Rusiyanın Böyük Britaniya ilə bağlı cavab addımları atacağından narahatdır. Ona görə bu məsələlər də düşünürəm ki müzakirə olunur".

Politoloq hesab edir ki, Moskva Londonla döyüşə bilməz:
"Ümumiyyətlə tarixdən də, indiyə kimi də Rusiya Böyük Britaniya ilə girdiyi döyüşlərdə həmişə uduzub. Məhz hazırda da əgər Ukrayna məsələsində Böyük Britaniya oyundadırsa, mən hesab edirəm ki, Rusiya bir çox məsələlərdə geri addım atmalıdır. Əgər Putin eskalasiyanı seçərsə, mən düşünürəm ki Rusiya burada məğlub olacaq"

M.Əsədullazadə Avropanın Ukraynaya dəstəyini xüsusi olaraq vurğulayıb:

"Avropanın Ukraynaya dəstəyi kifayət qədər güclüdür, Moskvanın Böyük Britaniyaya qarşı real hərbi addımları demək olar ki, Avropanı bürüyə bilər. Rusiya Böyük Britaniyanın müəyyən gəmilərini həbs edə bilər, amma birbaşa Böyük Britaniya ilə Rusiyanın üzbəüz gəlməsi qeyd etdiyim kimi, Rusiya üçün mənfi nəticələr verə bilər. Bunu Moskvada da bilirlər, mən hesab edirəm ki Mariya Zaxarovanın açıqlaması sadəcə olaraq açıqlama kimi qalacaq. Amma Vaşinqton da buna icazə verməz" deyə o bildirib .

Lalə Məmmədova

Telegramda izləyin