Süni intellekt həkimləri əvəz edə bilərmi? - AÇIQLAMA

Süni intellekt artıq tibbdə diaqnostika, tibbi görüntülərin təhlili və klinik qərarların dəstəklənməsi kimi sahələrdə istifadə olunur. Bununla belə, ÜST süni intellektdən istifadə zamanı təhlükəsizlik, insan nəzarəti və etik prinsiplərin qorunmasının vacibliyini vurğulayır.

Bəs, süni intellektin tibbdə geniş tətbiqi gələcəkdə həkimləri əvəz edə bilərmi, onun diaqnoz və müalicə seçimlərində etibarlılığı nə qədərdir və hansı hallarda qərarın mütləq həkim tərəfindən verilməsi vacibdir?
Mövzu ilə bağlı Sonxeber.az-a açıqlama verən tibb eksperti Şahvələd Məmmədov bildirib ki, ChatGPT kimi süni intellekt alətləri tibbdə həkimi əvəz edə bilməz.

"Aparılan araşdırmalar da bunu göstərir. Məsələn, bədəndə yaranan səpki, ləkə və ya hər hansı simptom süni intellekt alətinə təqdim edildikdə, həmin əlamətlərin bir neçə müxtəlif xəstəliklə əlaqəli ola biləcəyi bildirilir. İstifadəçi əlavə suallar verdikdə də süni intellekt müxtəlif ehtimalları sadalayır və konkret diaqnoz müəyyənləşdirmir. Nəticədə isə həkimə müraciət etməyi tövsiyə edir".

Ekspert bildirib ki, bu baxımdan ChatGPT və digər süni intellekt alətləri yalnız istiqamətləndirici vasitə kimi istifadə oluna bilər:

"Məsələn, qan xəstəliyindən şübhələnildikdə hematoloqa, revmatoloji şikayətlər olduqda revmatoloqa, ürək-damarla bağlı problem ehtimalında isə kardioloqa müraciət etmək barədə istiqamət verə bilər. Lakin süni intellektin konkret diaqnoz qoyması mümkün deyil. Tibbi müayinə, xəstənin vəziyyətinin qiymətləndirilməsi və yekun diaqnoz həkim tərəfindən müəyyənləşdirilməlidir".

Röyalə Xəyal

Telegramda izləyin