Dəyişkən hava şəraitində xəstələnməmək üçün nələrə diqqət edək? - AÇIQLAMA

Son günlər havanın tez-tez dəyişməsi, temperaturun kəskin enib-qalxması və küləkli hava orqanizmin uyğunlaşma prosesini çətinləşdirə bilər.

Belə dövrlərdə xüsusilə soyuqdəymə, virus infeksiyaları, allergik reaksiyalar və xroniki tənəffüs xəstəliklərinin əlamətləri daha çox müşahidə olunur.

Bəs dəyişkən hava şəraitində xəstələnməmək və orqanizmi qorumaq üçün nələrə diqqət etmək lazımdır?

Terapevt Ülviyyə Ələkbərova bu barədə Sonxeber.az -a açıqlama verib:

"Dəyişkən hava şəraitində orqanizmin temperatur dəyişikliyinə uyğunlaşması müəyyən qədər vaxt tələb edir. Xüsusilə səhər və axşam saatlarında temperaturun aşağı, gün ərzində isə daha yüksək olması insanın geyim seçiminə və gündəlik rejiminə diqqət etməsini zəruri edir. Burada əsas məsələ havaya uyğun geyinmək, bədəni nə həddindən artıq soyutmaq, nə də çox isitməkdir.

Belə havalarda ən çox rast gəlinən problemlərdən biri yuxarı tənəffüs yollarının virus infeksiyalarıdır. Lakin "hava dəyişdi, ona görə xəstələndim" yanaşması tam doğru deyil. Soyuq və dəyişkən hava xəstəliyin birbaşa səbəbi deyil. Əsas səbəb infeksiyalara yoluxmadır. Bununla belə, soyuq hava və qapalı məkanlarda daha çox vaxt keçirmək tənəffüs yolu infeksiyalarının yayılmasına şərait yarada bilər.

Xəstəliklərdən qorunmaq üçün ilk növbədə yuxu rejiminə və qidalanmaya diqqət edilməlidir. Orqanizmin normal fəaliyyət göstərməsi üçün kifayət qədər zülal, tərəvəz, meyvə və maye qəbul etmək vacibdir. "İmmuniteti gücləndirmək" adı ilə həkim məsləhəti olmadan müxtəlif vitamin və əlavələrdən istifadə etmək isə düzgün deyil. Vitamin çatışmazlığı müəyyən edilmədiyi halda əlavə preparatların qəbulu hər zaman fayda vermir.

Dəyişkən havalarda insanların yol verdiyi digər səhv isə xəstəlik əlamətlərinə baxmayaraq gündəlik həyatını əvvəlki kimi davam etdirməsidir. Boğaz ağrısı, öskürək, burun axması, halsızlıq və xüsusilə hərarət varsa, insan həm özünü yükləməməli, həm də infeksiyanı ətrafdakılara yaymamaq üçün məsafə və gigiyena qaydalarına riayət etməlidir.

Xüsusilə astma, xroniki bronxit, ürək-damar və digər xroniki xəstəlikləri olan şəxslər hava dəyişikliklərinə daha həssas ola bilərlər. Bu insanlarda öskürək, nəfəs darlığı və ya mövcud xəstəliyin əlamətlərinin artması müşahidə edilərsə, vəziyyəti yalnız hava dəyişkənliyi ilə əlaqələndirib gözləmək olmaz.

Ən vacib məqamlardan biri də antibiotiklərdən özbaşına istifadə etməməkdir. Soyuqdəymə və əksər respirator virus infeksiyalarında antibiotiklərin faydası yoxdur. Dərman seçimi xəstəliyin əlamətlərinə və şəxsin ümumi vəziyyətinə uyğun olaraq həkim tərəfindən müəyyən edilməlidir.

Yəni, dəyişkən havalarda xəstəliklərdən qorunmağın ən effektiv yolu xüsusi "möcüzəvi" vasitə axtarmaq deyil. Normal yuxu, balanslı qidalanma, kifayət qədər maye qəbulu, havaya uyğun geyim, otaqların havalandırılması, əl gigiyenası və xəstə insanlarla yaxın təmasın məhdudlaşdırılması əsas profilaktik tədbirlərdir".

Telegramda izləyin