Eyni ərazi, fərqli qiymət: Əmlak qiymətlərini nə müəyyənləşdirir?

Eyni ərazidə yerləşən və oxşar xüsusiyyətlərə malik evlərin qiymətləri belə bir-birindən ciddi fərqlənə bilər. Burada təmirin səviyyəsi, sənədlərin tamlığı, torpağın hüquqi statusu, evin tikinti keyfiyyəti, yerləşdiyi küçə, nəqliyyat və infrastruktura yaxınlıq kimi amillər mühüm rol oynayır.

Bəs, daşınmaz əmlakın qiymətini müəyyənləşdirən əsas amillər hansılardır, eyni ərazidə yerləşən evlərin qiymətləri niyə kəskin fərqlənə bilər və alıcı üçün evin qiymətinə ən çox təsir edən hansı xüsusiyyətlərdir?
Mövzu ilə bağlı Sonxeber.az-a açıqlama verən əmlak məsələləri üzrə ekspert Elnur Azadov bildirib ki, daşınmaz əmlakın eyni ərazidə fərqli qiymətlərlə təklif olunmasının bir neçə səbəbi var.

"İlk növbədə, bu, mənzillərin müvafiq sənədləri ilə bağlı ola bilər. Məsələn, eyni ərazidə bir binanın çıxarışı ola bilər, digər binanın isə müvafiq qəbul aktı və ya çıxarışı olmaya bilər. Uzun müddət yaşayış olan, lakin çıxarışı olmayan binalar problemli bina hesab oluna bilər və belə binalarda mənzillərin qiyməti daha aşağı ola bilər. Digər səbəb bəzi binaların daha nüfuzlu və prestijli olmasıdır. Eyni ərazidə bir bina adi, digəri isə daha prestijli və tanınmış ola bilər. Bu halda həmin binalardakı mənzillərin qiymətləri də fərqlənir".

Ekspert bildirib ki, təmir vəziyyəti də qiymətə ciddi təsir göstərir:

"Bundan başqa, bəzi mənzillər standart xüsusiyyətlərdən fərqlənə bilər. Məsələn, sonuncu mərtəbədə yerləşən, panoraması olmayan, obyektin üzərində yerləşən, yaxud teras və balkon sahəsi həddindən artıq böyük olan mənzillər ola bilər. Dəhliz sahəsinin çox böyük olması da mənzilin xüsusiyyətlərinə təsir göstərir. Belə mənzillərin likvidliyi daha aşağı olduğuna görə qiymətləri eyni binadakı digər mənzillərdən aşağı ola bilər. Praktika göstərir ki, eyni ərazidə, hətta eyni binada olan mənzillərin də qiymətləri fərqlənə bilər. Bəzən bu fərq mənzilin əşyalarla birlikdə satılması ilə bağlı olur. Məsələn, studiya mənzillər çox vaxt daxilindəki əşyalarla birlikdə satılır".

Onun sözlərinə görə, studiya mənzillərdə kvadratmetr üzrə qiymət böyük, məsələn, 4 və ya 5 otaqlı mənzillərlə müqayisədə daha yüksək ola bilər. Bəzi hallarda bu fərq 30-35 faizə qədər çata bilər.

Röyalə Xəyal

Telegramda izləyin