77 yaşlı kişi supermarketdə döyülərək öldürülüb

ABŞ-ın Virciniya ştatının Norfolk şəhərində supermarketdə baş verən mübahisə 77 yaşlı Bert Atienzanın ölümü ilə nəticələnib.

Sonxeber.az xarici mediaya istinadla xəbər verir ki, hadisənin 17 yaşlı qadın işçinin Atienzanın həyat yoldaşına alış-veriş arabası ilə az qala çırpılması ilə başladığı bildirilir. Mübahisədən sonra qadının valideynləri - 44 yaşlı Travis White və 42 yaşlı Erika Mitchell supermarketə gəlib.

Təhlükəsizlik kameralarının görüntülərində bir neçə şəxsin yaşlı kişini əhatəyə alaraq döydüyü, yerə yıxıldıqdan sonra isə onu təpikləməyə davam etdiyi görünür. Həyat yoldaşının sözlərinə görə, Atienza hücum zamanı ürək problemi olduğunu deyib.

Ağır kəllə-beyin travması alan 77 yaşlı kişi xəstəxanaya çatdırılıb və hadisədən bir gün sonra dünyasını dəyişib. Polis ölümü qətl kimi qiymətləndirib.

White və Mitchell əvvəlcə ağır xəsarət yetirmə və digər ittihamlarla saxlanılsalar da, sonradan onlara ikinci dərəcəli qətl ittihamı irəli sürülüb. Onların vəkili hadisənin əvvəlcədən planlaşdırılmadığını bildirib.

Mübahisədə iştirak edən 17 yaşlı işçi də hücum və digər cinayətlərlə bağlı ittiham olunub. Supermarket rəhbərliyi onun artıq şirkətdə işləmədiyini açıqlayıb.

Telegramda izləyin