Yeməkdən sonra şişkinliyin səbəbi bu xəstəliklər ola bilər - XƏBƏRDARLIQ

Yeməkdən sonra qarında şişkinlik bir çox insanda müşahidə olunan və qidalanma vərdişləri, həzm prosesi və qəbul edilən qidalarla bağlı yarana bilən haldır. Lakin şişkinliyin tez-tez təkrarlanması, uzun müddət davam etməsi və digər əlamətlərlə müşayiət olunması həzm sistemi ilə bağlı hər hansı problemin göstəricisi də ola bilər. Bu baxımdan, şişkinliyin nə zaman normal hesab edildiyini, nə zaman isə tibbi müayinəyə ehtiyac olduğunu bilmək vacibdir.

Bəs, yeməkdən sonra qarında şişkinliyin əsas səbəbləri nələrdir, bu hal nə zaman normal həzm prosesi, nə zaman isə hər hansı xəstəliyin əlaməti hesab oluna bilər və şişkinlik tez-tez təkrarlanırsa, insan hansı hallarda həkimə müraciət etməli, gündəlik qidalanmasında nələrə diqqət etməlidir?
Mövzu ilə bağlı Sonxeber.az-a açıqlama verən tibb eksperti Adil Qeybulla bildirib ki, həzmin pozulması ilə müşayiət olunan çoxsaylı xəstəliklər var.

"Bunlar mədə, qaraciyər, mədəaltı vəzi və bağırsaqların ayrı-ayrı xəstəlikləri ola bilər. Xroniki hepatit, qaraciyərin piylənməsi, pankreatit, bağırsaqların iltihabi xəstəlikləri, Kron xəstəliyi, qeyri-spesifik xoralı kolit və digər çoxsaylı xəstəliklər həzm pozğunluğuna səbəb ola bilər. Hər bir konkret vəziyyətdə səbəb müayinə və araşdırma nəticəsində müəyyən edilməli və buna uyğun müalicə aparılmalıdır. Həzm adekvat deyilsə, ilk növbədə hər hansı orqanda xəstəliyin olub-olmamasına, eləcə də bütövlükdə həzm sisteminin hərəkət istiqamətinə diqqət edilməlidir".

Ekspert bildirib ki, bəzən mədə-bağırsaq sistemində reflükslər, yəni qidanın geriyə atılması baş verir:

"Sfinkter çatışmazlığı da buna səbəb ola bilər. Mədə ilə qida borusunu və onikibarmaq bağırsağı ayıran sfinkterlər qidanın müəyyən müddət ərzində saxlanmasına və hissə-hissə təxliyə olunmasına şərait yaradır. Həzm pozğunluğu həmçinin həzm sisteminin motor və hərəki funksiyasının, qaraciyərin və mədəaltı vəzinin fermentativ funksiyasının pozulması ilə əlaqəli ola bilər. Bundan başqa, bağırsaqlarda iltihab prosesləri, bəzi bağırsaq infeksiyaları, hətta bağırsaq vərəmi də bu vəziyyətə səbəb ola bilər. Ona görə də həzm pozğunluğunun səbəbini yalnız bir konkret epizoda əsasən müəyyənləşdirmək çətindir. Səbəb mütləq araşdırılmalı və nəticəyə uyğun müalicə aparılmalıdır".

Röyalə Xəyal

Telegramda izləyin