The Guardian: "Ukraynada yerləşdiriləcək Avropa hərbçiləri Rusiya hücumlarına cavab verə biləcək"

Böyük Britaniya və Fransa Ukraynada mümkün atəşkəsdən sonra yerləşdirilməsi nəzərdə tutulan Avropa hərbi qüvvələrinin təhlükəsizlik qaydalarını müəyyənləşdirir. Plana əsasən, Rusiya qüvvələri Avropa hərbçilərinə hücum edərsə, onlar özünümüdafiə məqsədilə cavab atəşi aça biləcəklər.

Nəşrin məlumatına görə, Böyük Britaniya və Fransanın rəhbərlik edəcəyi ehtimal olunan missiya NATO-nun tərkibində fəaliyyət göstərməyəcək. Hərbi qüvvələrin əsasən Avropa texnologiyalarından istifadə etməsi, ABŞ-ın Starlink kimi sistemlərindən asılı olmaması nəzərdə tutulur.

11 ölkə hərbi təlimlərə qatılacaq

Noyabrın 9-dan 22-dək Polşada keçiriləcək Koalicja təlimlərində 11 ölkədən 2 800 hərbçinin iştirakı planlaşdırılır.

Sonxeber.az The Guardian-a istinadən xəbər verir ki, onlardan 1 500-ü Fransa, 300-ü isə Böyük Britaniya hərbçiləri olacaq.

Təlimlərin məqsədi mümkün atəşkəsdən sonra Avropa qüvvələrinin Ukraynaya sürətlə yerləşdirilməsi və birgə fəaliyyət imkanlarının yoxlanılmasıdır.

Rusiya ilə birbaşa qarşıdurma riski

Planlaşdırılan missiyanın əsas vəzifələrindən biri Ukrayna ordusunun müharibədən sonrakı dövrdə gücləndirilməsinə kömək etməkdir. Avropa hərbçilərinin əsasən cəbhə xəttindən uzaq ərazilərdə yerləşdirilməsi nəzərdə tutulur.

Bununla belə, hərbçilərə pilotsuz uçuş aparatları da daxil olmaqla mümkün hücumlara qarşı özünümüdafiə hüququnun verilməsi Rusiya ilə birbaşa qarşıdurma riskini gündəmə gətirir.

Müəllif: İlkin Məmmədkərimov

Telegramda izləyin