Azərbaycanlı turistlər Meksikada

Azərbaycanın qabaqcıl turizm agentliklərinin nümayəndələri Meksikaya səfər ediblər.

Sonxeber.az xəbər verir ki, bu barədə Meksikanın ölkəmizdəki səfirliyindən məlumat verilib.

Qeyd olunub ki, səfər zamanı Mexiko şəhəri və Kintana Ru ştatı ilə tanış olub, orada Kankun və Rivyera Mayanın digər məkanlarına səyahət ediblər. Azərbaycanlı nümayəndələr Antropologiya Muzeyi və Teotiuakan Piramidaları kimi böyük mədəni və tarixi marağa malik bir sıra yerləri tanımaq imkanı qazanıblar. Eyni zamanda, əsrarəngiz çimərliklər, zəngin təbiət və milli mətbəxin nümunələrindən zövq alıb, mədəniyyət xüsusiyyətlərini və Meksikada təklif olunan xidmətlərin yüksək keyfiyyətini təqdir ediblər. Meksika səfiri Rodriqo Labardini sözügedən səfərdə iştirak edənlər ilə görüşüb.

Turizm nümayəndələri öz təəssüratlarını bölüşərək Meksikanın turizm potensialını müsbət dəyərləndiriblər. Görüş əsnasında Meksika ilə Azərbaycan arasında turizmin inkişafı perspektivləri, turist axınlarının qarşılıqlı artımı və bu sektorda təcrübə mübadiləsinin səmərəliliyindən söhbət açılıb.

Səfir Meksikanın turizm sektoru barədə məlumat verib və ölkənin turizm marşrutları və istiqamətləri haqqında faydalı məlumatlarla zəngin www.visitmexico.com saytını qonaqlara təqdim edib. Diplomat pandemiyadan sonrakı dövrdə sektorun yenidən canlanması üçün səylərin davam etdirilməsi, iqtisadiyyatın bu vacib sahəsinin bərpası naminə hər iki ölkənin turizm sahəsi nümayəndələri arasında əlaqələrin təşviq olunmasının zəruriliyini vurğulayıb.

Telegramda izləyin

instagramda izləyin