Gənclərin mənzil problemini həll etmək üçün hansı addımlar atılmalıdır? - AÇIQLAMA

Bu gün aktual olan problemlərdən biri gəclərin mənzillə təmin edilməsidir. Bu gün gənclər ev almaq üçün ucuz başa gəldiyinə görə mənzilləri bünövrədən almağa çalışırlar. Lakin bu zaman müəyyən fırıldaqçılıqlarla qarşılaşırlar. Eyni zamanda mənzil qiymətləri baha-başa gəldiyi üçün ev ala bilmirlər. Bəs Azərbaycanda gənclərin mənzil problemini aradan qaldırmaq üçün hansı addımlar atılmalıdır?

Məsələ ilə bağlı Milli Məclisin deputatı Müşviq Cəfərov Sonxeber.az-a açıqlamasında bildirib ki, bu gün ölkəmizdə Azərbaycanda əhalinin mənzil şəraitinin yaxşılaşdırılması məqsədilə hökumət Mənzil İnşaatı Dövlət Agentliyi və İpoteka və Kredit Zəmanət Fondu vasitəsi ilə güzəştli və aşağı faizli ipoteka kreditləri təklif edir:

"Amma bu mənzil problemini nisbətən aradan qaldırmaq üçün kifayət etmir. Belə ki, çoxlu sayda gənc ailələr güzəştli ipoteka kreditlərinə müraciət edərək ev sahibi ola bilirlər. Lakin bu sahədə hələ də müəyyən boşluqlar var. Belə ki, hazırda insanlar ailə qurmadan öncə ev problemini həll etməyə çalışır, elə bu səbəbdən də dövrümüzdə ailə qurmağa üstünlük verən gənclərin sayı gündən-günə azalır. Doğrudur, gənc ailələrin evlə təminatı sahəsində getdikcə daha səmərəli addımlar atılır, lakin hələ də əksər gənc ailələr güzəştli kateqoriyaya düşmədikləri üçün sosial ev ala və güzəştli ipoteka kreditlərinə müraciət edə bilmirlər".

Deputatın sözlərinə görə, bu kontekstdən də sosial mənzil və eləcə də güzəştli ipoteka kreditinə müraciət hüququndakı müəyyənləşdirilmiş əngəllər bir qisim gənc ailələrə maneədir:

"Bu isə evsiz gənc ailələrinin məhz bu güzəştlərdən yararlanmasına imkan vermir. Təəssüf ki, ev problemi günümüzdə çoxalan boşanmalara səbəb olur. Amma mən bütün hallarda gənclərin əsas qayəsinin müəyyən bir mülkə sahib olmaq əvəzinə gəncliyin verdiyi şansları dəyərləndirib inkişaf və karyeraya yönəlmələrini daha düzgün hesab edirəm. Əgər daima nümunə kimi göstərilən Avropa ölkələrinə nəzər salsaq orada gənclərin əsas fokuslandığı məsələ karyeradır. Mən özüm Amerikada yaşayanda da buna şahid oldum. Təbii ki, bu ölkələrdə də gənc ailələr güzəştli mənzil sahibi olmaq üçün müraciət edirlər".

Sevda Səfərova

Telegramda izləyin