"Qanuni varis ola bilmədiyimiz üçün Xızı və Bakıdakı mülklərimizi ala bilmirik"- Mikayıl Müşfiqin qohumu kömək istəyir

"Müşfiq həbs ediləndən sonra sovet cəlladları onun bacısı Böyükxanımın evinə gəlib, həbs etmək istəyiblər. Lakin, o təslim olmayıb. O vaxt Böyükxanımın 30 yaşı var idi və bibisi oğlu Zeynalabidin ilə evil idi. Zeynalabidin işdə olarkən qara maşın Böyükxanımı həbs etməyə gəlir. Evdə axtarış aparırlar. Şəkilləri, kitabları götürürlər. Böyükxanım paltar dəyişmək bəhanəsi ilə yan otağa keçib, 3 litr benzini üstünə tökür. Həyətə çıxıb özünü odlayır. Qonşular alovu söndürməyə çalışsalar da, artıq iş-işdən keçir. Böyükxanım son nəfəsdə "Müşfiqə canım fəda olsun" deyir. Ailədən heç kəs yanında olmayıb. Çünki, həmin müddətdə Müşfiqin bütün yaxınları həbs olunurdu."
Bunu Moderator.az-a açıqlamasında sevgi şairi Mikayıl Müşfiqin əmisi nəvəsi, şair Yunus Dağlının qızı Reyhanə İsmayılzadə deyib. O daha sonra hələ də qanuni varis ola bilmədiyini bildirib.

"Qanuni olaraq bizə hər hansı bir sənəd verilməyib. Lakin atam şair-qəzəlxan Yunus (Dağlı) İsmayılzadə Mikayıl Müşfiqin əmisioğludur. Hətta M.Müşfiqin sümüklərinin tapılması ilə bağlı məsələ ortaya çıxdıqda Müşfiqin həyatda olan ən yaşlı kişi qohumu olduğu üçün qardaşım şair Vahab İsmayılzadədən DNT testi üçün nümunələr götürdülər. Biz çox istərdik ki, bizə bununla bağlı hər hansı qanuni sənəd verilsin. Çünki, bəzi hallarda bu sənədin olması zəruri haldır. Bizim Xızıda və Bakıda ata-babalarımıza məxsus bir çox mülklərimiz və torpaqlarımız olub. Biz bununla bağlı və varisliyimizi qanuniləşdirməklə bağlı bir çox müraciətlər etmişik, lakin mənfi cavab almışıq. Hal-hazırda məhkəməyə müraciət edib, varisliyimizi qanuniləşdirmək son çıxış yolumuzdur. Çünki, biz bu prosesi etməsək Müşfiqin adından çıxış edənlərin, Müşfiq haqqında dünyaya və xalqımıza doğru məlumatlar verməyənlərin, onun əsərlərini təhrif edənlərin sayı artacaq. Bizim çətinliyimiz hal-hazırda, əsasən məişət problemləridir. Lakin, əsas çətinliyimiz ailə olaraq Mikayıl Müşfiqin Bakıda onun yaşayıb-yaratdığı evin yerində ev-muzeyinin açılması ilə bağlıdır. Bununla bağlı da bir neçə müraciət etdik, lakin nəticəsiz qaldı. Müşfiqin Bakıda ev-muzeyinin açılması onun varisləri olaraq ən böyük arzumuz və əsas məqsədimizdir. Həmçinin, çox istərdik ki, dahi şairimiz Mikayıl Müşfiqin ailə üzvləri, ən yaxın qohumları kimi ölkə başçımız, cənab Ali Baş Komandan İlham Əliyev və vitse-prezidentimiz Mehriban xanım Əliyeva ilə görüşək. Çünki, inanıram ki, möhtərəm Prezidentimiz dahi şairimizin varislərini və Azərbaycan tarixinə və ədəbiyyatına töhfələr vermiş İsmayılzadələr nəslinin nümayəndələrini diqqətdən kənar qoymayacaq" deyə bildirib.

Reyhanə İsmayılzadə bildirib ki, qanuni varis kimi tanınmamaları Müşfiqin yaradıcılığına da kölgə salıb.
"İlk növbədə Müşfiq adından istifadə edənlər olduğu üçün varisliyimizi qanuniləşdirdiyimiz halda düşünürəm ki, bu problemi həll etmiş olacağıq. Həmçinin, ən böyük problem onun əsərlərini təhrif edənlərin, onun sözlərinə yazılmış mahnıların icazəsiz oxunmasıdır. Əlavə olaraq, Müşfiqə məxsus olmayan, qələminə və janrına uyğun olmayan əsərləri onun adına çıxarırlar. Qanuni sənədimiz olduğu halda düşünürəm ki, bunların hamısının qarşısını almaq olacaq" deyə şairin qohumu bildirib.

Telegramda izləyin