Türkiyədən sonra Azərbaycanda iş saatı AZALDILA BİLƏRMİ? - AÇIQLAMA

Xəbər verdiyimiz kimi, Türkiyə Əmək Qanununda maaşlardan iş saatlarına, ümumi tətil ödənişlərindən çevik işə, həftəlik məzuniyyətdən illik məzuniyyətə qədər bir çox mövzuda yeni tənzimləmələr gündəmdədir. Tənzimləmə çərçivəsində iş saatları 40 saata qədər azaldılacaq. Əmək və Sosial Müdafiə Naziri Vedat Işıkhan da Dövlət Sektoru Əmanət və Səmərəlilik Paketinə daxil olan çevik iş modeli üzərində işlərin iyun ayında başlayacağını bildirib. Bildirilir ki, 45 saatlıq iş saatı 40 saata, bəzi peşə qruplarında 48 saatlıq iş saatı isə 40 saata endirilə bilər.

Bəs sözügedən təklif Azərbaycanda da tətbiq edilə bilər? Mövzu ilə bağlı Sonxeber.az-a danışan sosioloq Mətanət Məmmədova bildirib ki, qeyd olunan məsələ ötən həftə Türkiyənin vitse-prezidenti Cevdet Yılmazın sədrliyi ilə keçirilən İnvestisiya Mühitinin Yaxşılaşdırılması Koordinasiya Şurasında da (YOİKK) müzakirə edilib:

"Məsələnin Beynəlxalq Əmək Təşkilatının (BƏT) iclasında da gündəmə gətirilməsi gözlənilir. Təklif olunur ki, 45 və bəzi peşə qruplarında olan 48 saatlıq iş saatı 40 saata endirilə bilər. Müxalifət isə ötən il Türkiyə Böyük Millət Məclisinə iş vaxtının həftədə 37,5 saata endirilməsi ilə bağlı qanun layihəsi təqdim edib. Azərbaycanda iş saatı əksər iş yerlərində 40 saatdır. Lakin bizdə də 45 və 48 saatlıq iş saatı ilə işləyən insanlar var. Əlbəttə, iş saatının edirilməsi təqdirəlayiq hal olar. Bu, insan amilinə verilən dəyər deməkdir".

Sosioloqun sözlərinə görə, işçini 45 və ya 48 saat çərçivəsində işlədən qurumlar öz işini elə qura bilər ki, işçi görəcəyi işi 40 və yaxud ondan aşağı saatda da həyata keçirə bilər:

" Bu, həm də israfçılığın qarşısını alan amildir. Məsələn, ən başlıcası elektrik enerjisinin və digər sərfiyyatların. Eyni zamanda insanların istirahət vaxtının artması deməkdir ki, insan nə qədər çox istirahət edərsə, o qədər keyfiyyətli iş görə bilər. Azərbaycanda düşünürəm ki, ilk təcrübə kimi aşağı əmək haqqı verilən idarə, müəssisə və təşkilatlarda bu məsələ tətbiq olunmalıdır. Çünki bununla aşağı əmək haqqı ilə işləyən işçilərin hüquqları da müdafiə edilmiş olar. Daha sonra isə digər qurumlara da tətbiq olunması əlbəttə ki, hər kəsin təqdir edəcəyi hal olar. Xüsusilə də qadınların. Çünki qadınların iş saatının azaldılması Milli Məclisdə də bir neçə ay əvvəl müzakirə edilib".

Qeyd edək ki, iclasda iş üslublarından irəli gələn ehtiyacların müəyyən edilməsi üçün texniki işlər müzakirə edildi. Uzaqdan, part-time və müvəqqəti iş kimi yeni nəsil çevik iş modelləri ilə bağlı qanunvericilik dəyişikliyi ehtiyaclarının iş dünyasının tələbləri, iş-özəl həyat balansı nəzərə alınmaqla müəyyən edilməsi qərara alınıb.

Sevda Səfərova

Telegramda izləyin