Qiymətlər qalxsa da ölkədə internetin keyfiyyəti niyə aşağıdır ? - AÇIQLAMA

Son zamanlarda sosial şəbəkələrdə vətəndaşların internetlə bağlı şikayətləri müşahidə olunur. Vətəndaşlar bildirir ki, internetin qiyməti qalxsa da, keyfiyyəti hətta əvvəlkindən də pisdir. Bəs görəsən buna səbəb nədir ?

Mövzu ilə bağlı Sonxeber.az -a açıqlama verən İT mütəxəssisi Elvin Abbasov bildirib ki, internetin keyfiyyətinin aşağı olması adətən modemlə bağlı olur:

"İnternet sürətinin 40 Mb-dən 100 Mb-ə artmasından sonra bu tip şikayətlərin olması təbiidir. Çünki ölkədə birdən-birə yüz faizin üzərində bir limit dəyişikliyi olub. Biz şikayətləri bir çox səbəblərə bölə bilərik. Bu şikayətlərin bəziləri texniki müstəvidə başa düşüləndir, bəziləri isə deyil. Bu səbələrdən biri modemlərin çox köhnə olmasıdır. Onlar 100 Mb interneti dəstəkləmir. Başqa bir səbəb modemlərdə düzgün tənzimləmələrin aparılmamasıdır. Digər bir səbəb isə həqiqətən də bəzi provayderlərin paylayıcılarında problemlərin olmasıdır. Hər bir halda bütün səbəblər texniki problemə əsaslanır".

Elvin Abbasov vurğulayıb ki, yaxşı olar ki, vətəndaşlar internetlərinə texniki müstəvidə baxış keçirsinlər:

"Əgər modemləri interneti dəstəkləmirsə, onu dəyişsinlər. Əgər provayderdə nasazlıq varsa aidiyyatı şəxslər bununla bağlı məlumat versinlər. Bəzi vətəndaşlar da deyir ki, 18 manat internet pulu ödəyəndə sürəti daha yaxşı idi. İndi isə 25 manat ödəyirəm, amma modemin yanından biraz uzaqlaşan kimi internet tutmur. Bunun internetlə heç bir əlaqəsi yoxdur. Bu modemin siqnallarının əhatəsi ilə əlaqəlidir. İnternetin surəti ilə Wi-Fi siqnallarının ötürmə radiusu arasında bir texniki əlaqə yoxdur. Wi-fi siqnalları harda tutursa orda da internet tutacaq. Bütün bu problemlərlə üzləşən vətəndaşlar həm modemlərinə, həm də internetlərinə texniki baxış keçirməlidirlər" .

Çiçək Sadatova

Telegramda izləyin