Polşa prezidentinin sərhəddə yerləşən missiyanın nümayəndələri ilə görüşməsi münasibətlərin gərginləşməsinə səbəb olan diplomatik addımdır

"Əgər əvvəllər Ermənistan xarici qüvvələrin əlində alət olmaq missiyasını yerinə yetirirdisə, indi erməni rəhbərliyi Qərbdən və onların müttəfiqlərindən istifadə edərək məqsədlərinə doğru irəliləməyə çalışır".

Bunu Sonxeber.az-a danışan deputat Müşfiq Cəfərov bildirib.

Deputat qeyd edib ki, təbii ki burada bütün müttəfiqliklər qarşılıqlı alış-veriş əsasında qurulub. Hazırda Ermənistan Qərbin Cənubi Qafqazda dayağı rolunu oynayır:

"Qərbin həyata keçirdiyi bu layihə regional təhlükəsizliyin təmin edilməsinə əngəllər yaradır. Çünki bu amil Bakı ilə İrəvan arasında münasibətlərin normallaşmasına və yekun sülh sazişinin imzalanmasına mane olur. Xüsusilə də, bir ildən çoxdur ki Ermənistan ərazisində yerləşib, mülki missiya adı altında hərbi-kəşfiyyat fəaliyyətləri aparan Avropa İttifaqı manipulyator olmaq istiqamətində daha çox fərqlənir. Təəssüf ki dırnaqarası missiyaçılar həm nümayəndələrinin sayını artırır, həm müddətini uzadır, həm də Fransa kəşfiyyatçıları missiya adı altında öz bayraqları ilə Azərbaycanla sərhədə yaxın əraziyə yerləşirlər. Aİ erməni cəmiyyətinə xidmət etmək üçün Avropanın digər ölkələrini də prosesə cəlb edir. Bu Aİ və Qərbin Azərbaycan dövlətinə və xalqına olan qərəzli mövqeyini nümayiş etdirən daha bir faktdır".

Deputat vurğulayıb ki, bu həftə Ermənistanda səfərdə olan Polşa Prezidenti Andjey Duda Azərbaycanla şərti sərhəddə olub:

"Polşanın dövlət başçısı Avropa İttifaqının Ermənistandakı müşahidə missiyasının heyəti ilə görüş keçirib.
Azərbaycan və Polşa arasında münasibətlərin gərginləşməsinə səbəb olan qəbuledilməz diplomatik addımın gərçəkləşməsi birbaşa Aİ və Ermənistanın planı üzrə reallaşdığını əminliklə demək olar.
Ermənistan və Fransanın məkrli planlarının bir hissəsi olan Avropa İttifaqının Ermənistanda fəaliyyət göstərən dırnaqarası missiyasının oyunlarına əlavə dövlətlərin də alət olunduğunu müşahidə edirik.
Polşa prezidentinin sərhəddə yerləşən missiyanın nümayəndələri ilə görüşməsinə heç bir səbəb yoxdur. Çünki hazırda vəziyyət stabildir. Tam əksinə, belə səfərlər məhz vəziyyəti gərginləşdirməyə xidmət edir. Ümumiyyətlə, Azərbaycan və Ermənistan arasındakı şərti sərhədə səfər edən Avropanın digər rəsmiləri var ki, 30 il ərzində Azərbaycanın işğal altında qalan torpaqlarına heç bir səfər etməyib və orada dağıdılmış evləri, ümumiyyətlə ermənilərin xaraba qoyduqları əraziləri müşahidə etməyiblər. Bu da bir daha onların ikiüzlü və riyakar yanaşmasını ortaya qoymaqla yanaşı açıq-aşkar təhrikdir. Həmçinin, bu birbaşa dövlətlərin daxili işinə qarışmaqdır".

Telegramda izləyin