Azərbaycanda uşaqların sosial mediadan istifadəsi qadağan ediləcək? - AÇIQLAMA

Bu günlərdə Türkiyənin Ailə və Sosial Siyasət naziri Sema Ramazanoğlu da ölkəsində bu təcrübənin tətbiqinə başlanıldığını və yeniyetmələr üçün sosial şəbəkələrdən istifadəyə qadağa qoyan qanun layihəsinin qəbul olunacağını bildirib.

Bəs görəsən belə bir qanun Azərbaycanda da qəbul edilə bilərmi?

Mövzu ilə bağlı sosioloq Mətanət Məmmədova Sonxeber.az – a açıqlama verib:

"Bizim ölkəmizdə bu qadağa daha çox vacibdir. Çünki bizim ölkəmiz öz ənənələri, mentaliteti olan, Şərq ölkələrindən biridir. Şərq ölkəsində gənclərin bu qədər Avropaya qapısını açması heç də düzgün nəticə vermir. Bu gün bizim gənclərimiz sosial mediadan faydalı şəkildə istifadə etmirlər. Ona görə də sosial media onlar üçün böyük bir bəlaya çevrilib. Gənclərimiz 24 saatlarını sosial mediada keçirdiklərindən bu, onların həyatlarını əllərindən alıb. İndiki gənclərimiz 20 il əvvəlki gənclərlə eyni düşüncədə deyillər. Onlar kitab oxumaqdan tamamilə yayınıblar. Sosial media onların əllərindən kitabları, düşünmək qabiliyyətini alıb. Bu da heç yaxşı gələcək vəd etmir. Sosial mediada nümayiş olunan həyatlar, evlər, maşınlar bizim gənclərimizə çox pis təsir edir. Çünki, hər bir arzuya çatmaq üçün müəyyən yollardan keçməlisən. Lakin, sosial medianın təklif etdiyi yollar gənclərdə sanki bu dəqiqə hərşeyi əldə etməliyəm kimi istəklər yaradır. Beləcə gənclərimiz öz yollarından çıxır. Sosial mediada təklif olunan müxtəlif oyunlar yüzlərcə gəncin həyatını məhv edib. Buna görə də sosial mediada gənclərə müəyyən qədər sədlər qoyulmalıdır. Yoxsa gələcəkdə biz bu problemlərin qarşısını heç cür ala bilməyəcəyik. Bu gün artıq dünya da görür ki, gənclər əldən gedir. Onların həyatı sosial mediada puç olur. Bu səbəbdən də belə qadağa xarakterli qanunlar qəbul olunur. Düşünrəm ki, yaxın gələcəkdə bizim də ölkəmizdə belə bir qanun layihəsi təklif olunacaq və qüvvəyə minəcək".

Çiçək Sadatova

Telegramda izləyin