"Bakıdakı tıxac probleminin yeganə həll yolu bölgələri inkişaf etdirməkdir" – AÇIQLAMA

Bakı sakinləri tıxaclarla bağlı narazılıqlarını tez-tez dilə gətirir. Belə ki, tıxaclar artıq o həddə çatıb ki, artıq "pik saat" deyilən bir anlayış qalmayıb. Artıq paytaxtın hər saatı tıxacdan ibarətdir.

Bəs görəsən tıxaclar niyə artıb və problemin həlli yolu nədir?

Mövzu ilə bağlı nəqliyyat eksperti Elməddin Muradlı Sonxeber.az – a açıqlama verib:

"Tıxacların artmasının əsas səbəbi odur ki, Bakıda avtomobilləşmə çox sürətlə gedir. İmkanı çatan hər kəs bu fürsəti qaçırmır və maşın alır. Düzdür, müxtəlif səbəblər ola bilər. Amma nəticə yaxşı deyil. Avtomobilləşmənin bu formada davam etməsi problemlər, tıxaclar yaradır. Artıq tıxacın pik saatı yoxdur. Belə bir anlayış qalmayıb. Günün hər saatı tıxac var. Artıq aidiyyati qurumlar vəziyyətdən qurtulmağın yollarını axtarır. Bunun da əsas yolu ictimai nəqliyyatı inkişaf etdirmək, yeni nəqliyyat vasitələri yaratmaq və ən əsası bölgələri inkişaf etdirməkdir. Bu gün bölgələrdə ayağı yer tutan Bakıya gəlir. Bunun səbəbi işsizlikdir. Əlbəttə sadəcə şəhər həyatı arzulayaraq Bakıya gələnlər də var. Amma, əksər insanlar maddi ehtiyaclar ucbatından yurd-yuvalarından didərgin düşüb şəhərə üz tuturlar. Bakının tıxac probleminin kökü bölgələrdir. Buna görə də bölgələrdə inkişaf lazımdır. yeni iş yerləri açılmalı, yaşayış səviyyəsi yaxşılaşdırılmalıdır. Mən bir çox ölkələrin təcrübələrinə nəzər yetirirəm, məsələn qardaş Türkiyədə, Gürcüstanda ən ucqar kəndlər belə inkişaf edib. Əyləncə mərkəzindən tutmuş, istirahət mərkəzinə qədər hərşey var. Ən əsası potensiallı iş yerləri var. Bizdə isə yanaşma fərqlidir. Bölgələrdə insanlar hesab edir ki, hamı mal-qara saxlamalıdır. Amma bu belə deyil. Bu fəlsəfə düzgün qurulmayıb. Yanaşma dəyişməli, iş yerlərinin açılması məsələsinə geniş aspektdən baxılmalıdır. Bakıdakı tıxac probleminin yeganə həll yolu bölgələri inkişaf etdirməkdir".

Çiçək Sadatova

Telegramda izləyin