Ağrıkəsicilər niyə bəzən kömək etmir? - Mütəxəssislər cavab verirlər

Ağrıkəsici dərmanlar ağrı və əzabları yüngülləşdirmək üçün nəzərdə tutulub, lakin bəzən onlar istənilən effekti verməyə bilər.

Oxu.Az-ın "İzvestiya"ya istinadla verdiyi məlumata görə, rusiyalı terapevt Olqa Çistik və əczaçı Dmitri Qurov ağrıkəsicilərin səmərəsizliyinin səbəbləri haqqında danışıblar, həmçinin onların düzgün qəbulu üçün tövsiyələr veriblər.

Çistik ilk səbəb kimi bunu yanlış dozalanma ilə bağlı ola biləcəyini deyib, məsələn, insan lazım olduğundan daha az qəbul edə bilər.

"İkincisi, bir sıra dərmanlar alkoqol və nikotinlə uyğun deyil. Buna baxmayaraq, xəstə siqaret çəkməyə və ya alkoqol qəbul etməyə davam edə bilər ki, bu da dərmanın effektini itirir. Eyni şey müalicə zamanı pəhrizə riayət etməyə də aiddir. Üçüncüsü, dərmanın qəbul qaydalarına riayət edilməsi vacibdir. Bu, xüsusilə günün vaxtı, dərmanın miqdarı, qidanın dərmandan əvvəl və ya sonra qəbulu qaydaları və qəbulun müntəzəmliyidir", - deyə həkim izah edib.

O, dərmanın düzgün seçilməməsinin də effektin olmamasına səbəb ola biləcəyini vurğulayıb.

"Aktiv maddələrindən asılı olaraq bir neçə növ ağrıkəsici var (iltihabəleyhinə, analgetiklər, anestetiklər, spazmolitiklər) və dərman konkret ağrı növünə uyğun seçilməlidir. Lakin çoxları hər halda bir dərman qəbul edir ki, bu da açıq-aşkar yanlışdır", - deyə mütəxəssis əlavə edib.

Terapevtin sözlərinə görə, bəzi insanlar ağrıkəsici dərmanın qəbulundan bir neçə dəqiqə sonra nəzərəçarpan effekt verməsini gözləyirlər.

"Amma bu belə deyil. Dərmanın orqanizmdə həzm olunması və təsir göstərməyə başlaması üçün vaxt lazımdır", - deyə o izah edib.

Əczaçı Qurov isə müxtəlif ağrı növləri üçün dərmanların əsas istiqamətlərini vurğulayıb. Belə ki, o, iltihabəleyhinə dərmanları qeyd edib.

"Təsiredici maddəsi nimesulid olan vasitələr əzələlərdə iltihaba qarşı, dayaq-hərəkət aparatı xəstəlikləri və əzilmələr zamanı effektivdir. İbuprofen oynaq xəstəlikləri zamanı ağrı sindromu ilə mübarizə aparır, baş ağrısı və menstrual ağrılar zamanı kömək edir", - deyə mütəxəssis izah edib.

Analgetiklərdən danışarkən o izah edib ki, təsiredici maddəsi metamizol natrium olan dərmanlar diş və ya əzələ ağrısı zamanı, ketrolak tromethanol - qızdırmalı vəziyyətlərdə, əməliyyatdan sonrakı ağrı növlərində və ya onkoloji ağrılarda istifadə olunur.

Əczaçı həmçinin anestetikləri də xatırladıb. Onun sözlərinə görə, lidokain hidroxlorid kosmetoloji proseduralardan əvvəl ağrıkəsici kimi istifadə olunur, həmçinin müxtəlif ağrı növləri üçün kombinə edilmiş dərmanların tərkibinə daxildir.

"Təsiredici maddəsi artikain və epinefrin olan dərmanlar sinir impulslarının ötürülməsini bloklayır və tibbi müdaxilədən - cərrahi və ya stomatoloji müdaxilədən əvvəl yerli anesteziya üçün uyğundur. Oksibuprokain angina, faringit, udqunma zamanı boğaz ağrısından kömək edir.

Spazmolitiklər - drotaverin hidroxlorid və mebeverin hidroxlorid - hamar əzələlərin tonusunu azaldır, bağırsaq sancıları və ya daxili orqanların spazmları zamanı uyğundur".

Qurov lazımi dərmanı müstəqil seçməyin kifayət qədər çətin olduğunu deyib.

"Məhz buna görə, həkimə müraciət etmək son dərəcə vacibdir. Ən tez-tez rast gəlinən ağrıları (onların intensivliyi, lokallaşması, müddəti və mümkün səbəbləri) göstərməklə öz anamnezinizi tərtib edə bilərsiniz. Bu məlumatlar əsasında həkim ən uyğun ağrıkəsicilərin siyahısını verəcək", - deyə mütəxəssis vurğulayıb.

Telegramda izləyin