"Xocalı soyqırımı Azərbaycan tarixində dərin izlər buraxan və insanlığa qarşı yönəlmiş ən ağır cinayətdir" - DEPUTAT

"İkinci Qarabağ müharibəsində əldə edilən zəfər, Azərbaycanın ərazi bütövlüyünü bərpa etməsi və işğaldan azad edilmiş ərazilərində böyük bərpa-quruculuq işlərinin başlanmasına zəmin yaratdı. Bu müharibə, həm də bir milli həmrəylik və qürur anı oldu. Azad edilmiş torpaqlarda infrastrukturun yenidən qurulması, şəhərlərin və kəndlərin bərpası, həmçinin sosial və iqtisadi həyatın canlandırılması istiqamətində mühüm layihələr həyata keçirilir. Soydaşlarımızın doğma yurdlarına mərhələli şəkildə qayıtması, həm mənəvi, həm də sosial baxımdan böyük əhəmiyyət daşıyır. Bu proses, həmçinin regionda uzunmüddətli sabitlik və inkişaf üçün əsaslı zəmin yaradır".

Bunu Sonxeber.az-a danışa deputat Şahin Seyidzadə bildirib.

Deputat qeyd edib ki, Xocalı azad edildikdən sonra həmin bölgənin bərpası infrastrukturların yenidən qurulması, həm də keçmiş məcburi köçkünlərin öz torpaqlarına geri dönməsi məsələsi diqqət mərkəzindədir:

"Bu, yalnız Xocalının bərpası deyil, həm də Qarabağ regionunun ümumi inkişafına və azad edilmiş ərazilərdə yeni həyatın bərqərar olunmasına yönəlmiş uzunmüddətli bir yanaşmadır. Keçmiş məcburi köçkünlərin öz doğma yurdlarına qayıtması, bu prosesin əhəmiyyətli bir hissəsidir. Soydaşlarımızın doğma yurdlarına qayıdışı, həm də Azərbaycanın güclənən müstəqilliyinin və ərazi bütövlüyünün simvoludur. Ali Baş Komandan İlham Əliyevin liderliyindəki siyasət, həmçinin xalqımızın birliyini və qətiyyətini dünyaya nümayiş etdirərək, bu torpaqlarda əbədi qalmağımızı təmin edir. Bu, həm də xalqın öz köklərinə bağlılığını və gələcəyə olan inamını gücləndirən bir addımdır".

Deputat vurğulayıb ki, Prezident İlham Əliyev, Azərbaycanın birinci vitse-prezidenti Mehriban xanım Əliyeva və qızları Arzu Əliyevanın 28 May - Müstəqillik Günündə işğaldan azad edilmiş Ağdam və Xocalı rayonlarına səfəri, Azərbaycanın tarixi və əhəmiyyətli bir anını simvolizə edir:

"Dövlət başçısı, Xocalı şəhərinə qayıdan sakinlərlə görüşündə, bu qayıdışın Müstəqillik Günündə olmasının əhəmiyyətini xüsusi vurğulamışdır. "Bu qayıdış, Azərbaycanın müstəqilliyinin bərpası ilə bağlı deyil, eyni zamanda xalqımızın tarixi ədaləti bərpa etmək və ərazilərini azad etmək uğrunda apardığı mübarizənin bir göstəricisi olaraq önəmlidir." Xocalı və Ağdam kimi ərazilərin geri qayıtması, Azərbaycanın ərazi bütövlüyünün təmin edilməsinin və xalqın sarsılmaz iradəsidir. Heç də təsadüfü deyil ki, bir neçə gün öncə Prezident İlham Əliyev Xocalının anım günü ərəfəsində Xocalı rayon Ballıca kəndində sakinlərlə görüşərək onların həyat şəraiti ilə yaxından tanış oldu. Prezident İlham Əliyev bir evdə çay süfrəsi zamanı xüsusi vurğuladı ki, Xocalı işğaldan azad olunandan sonra mən evdə buranın balından istifadə edirəm. Prezident İlham Əliyev Qarabağ bölgəsinə etdiyi səfərlərində, xüsusilə Xocalıya xüsusi önəm verir. Xocalı, 1992-ci ildə erməni işğalı nəticəsində ağır bir faciə yaşadı və həmin faciə, həmçinin Azərbaycanın tarixində dərin izlər buraxdı. 

Dövlət tərəfindən Xocalı faciəsinin heç vaxt unudulmaması və tanıdılması ilə bağlı müxtəlif tədbirlər həyata keçirilir. Bir sıra beynəlxalq təşkilatlara, dövlətlərə bu faciənin beynəlxalq səviyyədə tanınması ilə bağlı müraciətlər edilmiş, Xocalı soyqırımının dünya miqyasında tanınması üçün müxtəlif diplomatik təşəbbüslər və kampaniyalar aparılmışdır".

Telegramda izləyin