Zərərli qida məhsullarını istehsal edənləri bu cəzalar gözləyir - AÇIQLAMA

Son günlər vətəndaşlar tez-tez zərərli qida məhsullarını istehsal edən müəssiələrdən, həmin məhsulları satan mağazalardan şikayət edirlər.

Bəs görəsən qanunla zərərli qida məhsullarını istehsal edənlərin, satanların cəzası nədir?

Hüquqşünas Rəşad Əliyev mövzu ilə bağlı Sonxeber.az-a açıqlama verib:

"İstehlakçıların hüquqlarının müdafiəsi haqqında" Qanunun 13-cü maddəsinı əsasən istehlakçıların mal (iş, xidmət) haqqında məlumat almaq hüququ var.
Satıcı (icraçı) istehlakçını maraqlandıran malın (işin, xidmətin) qiyməti, istehlak xassələri (qida məhsulları barəsində isə; həm də qida və enerji dəyəri, tərkibi, miqdarı, keyfiyyət göstəriciləri, istehsal tarixi, yararlılıq müddəti, tərkibindəki allergenlər, mənşəyi), əldə edilməsi şərtləri, təminat öhdəlikləri və iddiaların irəli sürülməsi, malın işlədilməsi, saxlanılması və təhlükəsiz istifadəsi üsulları və qaydaları barəsində istehlakçıya zəruri və düzgün məlumat verməlidir
İstehlakçıların hüquqlarının pozulması həm inzibati, həm də cinayət məculiyyəti yaradır.
İnzibati Xətalar Məcəlləsinin 447-ci maddəsinə əsasən mal satan və ya əhaliyə xidmət göstərən şəxslər tərəfindən malın (xidmətin) ölçüsünə, çəkisinə, hesabına, habelə istehlak xüsusiyyətinə və ya keyfiyyətinə dair istehlakçıların az miqdarda aldadılmasına, saxlama müddəti ötmüş məhsulların satılmasına, standartların və digər normativ sənədlərin tələblərinə cavab verməyən malların istehsalına, satılmasına görə fiziki şəxslər üç yüz əlli manatdan beş yüz manatadək məbləğdə, vəzifəli şəxslər min beş yüz manatdan iki min manatadək məbləğdə, hüquqi şəxslər dörd min manatdan altı min manatadək məbləğdə cərimə edilir. Burada "az miqdarda" dedikdə, beş min manatdan yuxarı olmayan məbləğ başa düşülü
Bundan başqa, İstehlakçıları aldatma və ya pis keyfiyyətli məhsul istehsal etmə və satma Cinayət Məcəlləsinin 200-cü maffədi ilə cinayət məsuliyyəti də yaradır.
İstehlakçıları aldatma, yəni mal satan və ya əhaliyə xidmət göstərən təşkilatlarda, həmçinin ticarət (xidmət) sahəsində fərdi sahibkar qismində qeydə alınmış fiziki şəxslər tərəfindən malın (xidmətin) ölçüsünə, çəkisinə, hesabına, habelə istehlak xüsusiyyəti və ya keyfiyyətinə dair istehlakçıları xeyli miqdarda aldatma əməlinə yol vermiş şəxslər 3000 manatdan 5000 manatadək miqdarda cərimə və ya üç yüz altmış saatdan dörd yüz səksən saatadək ictimai işlər ilə cəzalandırılır.
Eyni əməllər təkrar törədildikdə, qabaqcadan əlbir olan bir qrup şəxs tərəfindən törədildikdə, külli miqdarda ziyan vurmaqla törədildikdə isə 5000 manatdan 7000 manatadək cərimə və ya üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə altı ayadək müddətə azadlıqdan məhrum etmə ilə cəzası nəzərdə tutulub.
Bilə-bilə pis keyfiyyətli məhsulların istehsalı, satışa buraxılması və ya belə məhsulların satışı, onların keyfiyyətsiz olmasının gizlədilməsi ehtiyatsızlıqdan zərərçəkmiş şəxsin sağlamlığına az ağır və ya ağır zərər vurulmasına səbəb olduqda isə 10000 manatdan 15000 manatadək miqdarda cərimə və ya iki ilədək müddətə azadlığın məhdudlaşdırılması və ya iki ilədək müddətə azadlıqdan məhrum etmə ilə cəzalandırılır.
Həmin əməllər ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda üç ildən yeddi ilədək müddətə azadlıqdan məhrum etmə ilə cəzalandırılır.
Bu maddədə "xeyli miqdar" dedikdə, beş min manatdan yuxarı, lakin otuz min manatdan artıq olmayan məbləğ, "külli miqdar" dedikdə otuz min manatdan yuxarı olan məbləğ başa düşülür"

Çiçək Sadatova

Telegramda izləyin