"Xocalıya hər qayıdış soyqırım qurbanlarının xatirəsinə ehtiramın daha bir nümayişidir" - DEPUTAT

"Otuz ilə yaxın işğal altında qalmış Qarabağ və Şərqi Zəngəzur özünün yeni inkişaf mərhələsinə qədəm qoyub. Qarabağ və Şərqi Zəngəzurda həyata keçirilən bərpa-quruculuq işləri hər birimizi qürurlandırır. Regionda geosiyasi vəziyyətə liderlik edən Azərbaycan, heç bir yerdən dəstək almadan işğaldan azad olunmuş ərazilərdə genişmiqyaslı quruculuq işlərini uğurla davam etdirir. Bir neçə gün əvvəl Prezident İlham Əliyevin Ağdam, Əsgəran, Xankəndi və Xocalıya səfərləri çərçivəsində gördüyümüz mənzərələr bərpa-quruculuq işlərinin uğurla davam etdiyinin əyani sübutudur".

Bu sözləri Sonxeber.az-a açıqlamasında Milli Məclisin üzvü Tamam Cəfərova deyib.

Deputat bildirib ki, Azərbaycan Qarabağ və Şərqi Zəngəzurda şəhərləri, kəndləri yenidən qurur:

"Ermənistanın məhv etdiyi mədəni, dini abidlərimiz bərpa edilir, yaşayış məskənləri, nəqliyyat infrasturukturu, elektrik şəbəkəsi, su təchizatı hər şey yenidən qurulur. Ölkəmiz bütün bunları heç bir yerdən bir manat dəstək almadan təkbaşına edir. Bütövlükdə Böyük Qayıdış proqramının birinci mərhələsində 100 yaşayış məntəqəsinin yenidən qurulması nəzərdə tutulur. 2022-ci ilin iyulunda Zəngilan rayonunun Ağalı kəndinə başlanan qayıdış hazırda beş şəhərin- Füzuli, Laçın, Şuşa, Xocalı və Cəbrayılın, 4 kəndin-Ağalı, Talış, Zabux və Susun sakinlərinə qovuşması ilə davam edir. Dövlətimizin başçısı İlham Əliyev hələ ötən ilin yanvarında yerli televiziya kanallarına müsahibəsində 2024-cü il ilə yanaşı, 2025-ci ildə də sakinlərinə qovuşacaq şəhərlərin adlarını açıqlamışdı. 2024-cü ildə 1400-dən artıq ailə Laçın, Cəbrayıl, Füzuli, Şuşa və Xocalı şəhərlərinə, Laçın rayonunun Zabux və Sus kəndlərinə, Xocalı rayonunun Ballıca kəndinə köçürüldü. Ağdam, Qubadlı, Zəngilan şəhərlərinə qayıdış 2025-ci ildə nəzərdə tutulub".

Qeyd edək ki, fevral ayının 19-də cənab Prezident İlham Əliyev və Birinci vitse-Prezident Mehriban Əliyeva Xocalı rayonuna səfər çərçivəsində Ballıca kəndində fərdi evlərin və infrastrukturun bərpası sahəsində görülən işlərlə tanış olub, sonra kəndə köçən bir qrup sakinlə görüşüb. Cənab Prezident Ballıca kəndinin sakinləri ilə görüşdə Xocalını azad etməyin hər zaman gündəlikdə duran məsələ olduğunu qeyd edib. Xocalı soyqırımın ildönümü ərəfəsində Ballıca kəndinin sakinlərinin öz ata-baba yurdlarına qayıdışının təmin olunması əlbəttə, təsadüf deyil. Bu tarixi ədalətin növbəti təntənəsidir".

Deputat vurğulayıb ki, Xocalıya hər qayıdış soyqırım qurbanlarının xatirəsinə ehtiramın daha bir nümayişidir:

"Bundan başqa işğaldan azad olunan ərazilərimizdə tarixi-mədəni abidələrimizin bərpasına da dövlət tərəfindən xüsusi diqqət ayrılır. Bu işdə Birinci vitse-Prezident Mehriban Əliyevanın rəhbərlik etdiyi Heydər Əliyev Fondu mühüm layihələr həyata keçirir. Beləki, Fond tərəfindən Şuşada Molla Pənah Vaqifin muzey-məqbərə kompleksi, Vaqifin büstü, Mehmandarovların malikanə kompleksi təmir olunub, Zəngilan məscidi tikilib, Ağdam Cümə məscidi isə bərpa edilib. Bu baxımdan Əsgəran qala kompleksinin bərpası da xüsusi önəm daşıyır. Həmçinin, onu da qeyd etməliyik ki, cənab Prezident İlham Əliyevin Ağdam şəhərində "İmarət" Tarix-Memarlıq Muzey Kompleksinin yaradılması barədə sərəncam imzalaması Azərbaycan tarixinə hörmət və ehtiramın daha bir nümunəsidir. Xüsusi vurğulamalıyıq ki, Qarabağ işğaldan azad olunandan sonra xarici mütəxəssislərin iştirakı ilə bu ərazilərdəki digər tarixi-mədəni və dini abidələrlə yanaşı, "İmarət"də də restavrasiya və arxeoloji tədqiqat işlərinə start verilmişdi. Vəhşi erməni vandalizminə məruz qalmış kompleksə, o cümlədən Pənahəli xanın imarətinə, İbrahimxəlil xanın türbəsinə və Xurşidbanu Natəvanın qəbirüstü abidəsinə də ikinci həyat bəxş edilməyə başlamışdı. Ötən il sentyabrın 19-da isə dövlətimizin başçısı XVIII əsrə aid olan bu tarixi kompleksin bərpadan sonra açılışında iştirak edib. İndi isə 20 fevral 2025-ci il tarixli sərəncamla burada "İmarət" Tarix-Memarlıq Muzey Kompleksinin yaradılmasına qərar verilib.

Həyata keçirilən bütün bu bərpa-quruculuq işləri Azərbaycan dövlətinin iqtisadi-siyasi gücünü dünyaya nümayiş etdirir. Hazırda dünyanın bir çox yerində müharibə və münaqişələr şiddətlə davam edir. Bir çox şəhərlər, kəndlər, yaşayış məskənləri viran qalır, insanlar yaşadıqları yerləri tərk etməli olurlar. Dünyada baş verən bütün bu faciələrin əksinə olaraq, Azərbaycan otuz illik həsrətə son qoyaraq, torpaqlarının bərpasını sürətlə həyata keçirir, keçmiş məcburi köçkünləri öz ata-baba yurdlarına qovuşdurur. Bu istiqamətdə Azərbaycanın qazandığı təcrübə bütün dünyaya örnək təşkil edir. Azərbaycan həyata keçirdiyi bərpa-quruculuq işləri ilə dünyada nümunəvi ölkələrdən biridir".

Telegramda izləyin