"Azərbaycanda Səhiyyə Nazirliyi qəflət yuxusuna gedib" - Spirtdən zəhərlənib ölənlər barədə SENSASİON AÇIQLAMA

22-23 fevral tarixlərində Sabunçu rayonu ərazisində ümumilikdə 15 nəfər etil spirtindən zəhərlənərək ölüb.

Belə ki, vətəndaşların zəhərlənərək öldüyü spirt "Starlyuks" əmtəə nişanı adı altında satılan gigiyenik vasitədir.

Lakin, sözügedən markanın lisenziyası belə yoxdur və bu məhsulun apteklərə satışı əldən həyata keçirilir.

Digər maraqlı məlumat ondan ibarətdir ki, 15 nəfərin ölümü ilə bağlı rəsmi xəbər yayıldıqdan sonra, bu və buna bənzər lisenziyası olan spirtlərin apteklərdə satışı dayandırılıb. Bu barədə aptek rəhbərləri işçilərə göstəriş verib.

Qeyd edək ki, apteklər bu məhsulu 33-35 qəpiyə alıb müştəriyə 50 qəpiyə satır.

Bu zaman ortaya bir sual çıxır. Niyə apteklər lisenziyası olmayan məhsulu vətəndaşlara satır? Yoxsa, Səhiyyə Nazirliyi apteklərə kifayət qədər nəzarət edə bilmir?

Sosioloq Mətanət Məmmədova bu barədə Sonxeber.az -a danışıb:

"Elə bir ölkə yoxdur ki, apteklər Azərbaycandakı qədər özbaşına olsun. Bizdə apteklər demək olar ki, nəzarət mexanizmindən çoxdan çıxıblar. Hansı ki, Səhiyyə Nazirliyi və onun tərkibindəki Analitik Ekspertiza Mərkəzi apteklərə birbaşa nəzarət edir. Görünən isə budur ki, onların nəzarəti o qədər zəifləyib ki, vəziyyət bu həddə çatıb. Spirtdən insanlar zəhərlənib ölür. Bu, çox gülünc və utancverici hadisədir. Məsələnin bu tərəfini düşünmək Səhiyyə Nazirliyinin üstünə düşür. Nə üçün spirtdən insanlar zəhərlənir? Həmin spirt hansı nəzarətdən çıxıb satışa buraxılıb? Bütün bu suallar o qurumlara verilməlidir.

İqtisadiyyat Nazirliyinin şöbələrindən biri bu məsələlərə, xüsusilə də, apteklərimizdəki qiymət məsələlərinə nəzarət edir. Bizim 15 gün əvvəl aldığımız dərmanın qiyməti bu gün 2 manat 50 qəpik artıb. Yüzlərlə insan bunun kimi hadisələrlə hər gün qarşılaşır. Qiymət artımına nəzarət qətiyyən yoxdur. Dərmanların keyfiyyətinə isə ümumiyyətlə heç kəs cavab verə bilmir. Bunun səbəbi apteklərin nəzarətsiz buraxılmasıdır. Mən düşünrəm ki, ölkəmizdə apteklərin fəaliyyəti ilə bağlı ciddi bir qanun qəbul olunmalıdır. Səhiyyə Nazirliyi və onun tərkibindəki Analitik Ekspertiza Mərkəzi bu problemləri həll edə bilmirsə, səlahiyyət onların əlindən alınmalıdır. Məsələni həll edəcək yeni bir qurum yaradılmalıdır. Burda söhbət vətəndaşın sağlamlığından, taleyindən gedir. Səhiyyə Nazirliyinə kim bu haqqı verir ki, onun tabeliyində olan qurum ən adi problemi həll edə bilmir və vətəndaş spirtdən zəhərlənib ölür. Kim bilir, o spirtin tərkibində nələr olub. Bunların hamısı sorğulanmalıdır. Həmin spirti satan aptekin rəhbərliyi də, o spirti satan firma da cinayət məsuliyyətinə cəlb edilməlidir. Bu işdə günahı olan hər kəs cəzalandırılmalıdır.

Düşünürəm ki, bizim Səhiyyə Nazirliyimiz qəflət yuxusuna gedib. Artıq oyanmaq vaxtıdır. Problemləri saymaqla bitirmək olmur. Təhsili olmayan həkimlərə saxta sertifikatlar, icazələr verilməsi, apteklərdəki özbaşınalıqlar… Əgər axtarsaq daha nələr, nələr öyrənərik. Biz sadəcə mətbuata yansıyan problemləri bilirik. Bilmədiyimiz çox şey var.

Çox ciddi tədbirlər görülməlidir. Dövlət bu işə nəzarət etməlidir. Əgər Səhiyyə Nazirliyi öz işinin öhdəsindən gələ bilmirsə, yeni bir qurum yaradılmalıdır. Bəlkə onda bu məsələlər də həllini tapar. Vətəndaşın taleyi ilə bu qədər oynamaq olmaz. Apteklərdəki özbaşınalıq, qiymət artımları aradan qaldırılmalıdır. Dərmanların keyfiyyətinə nəzarət edilməlidir. Milli Məclisdə əyləşən deputatlar bu problemləri müzakirə etməlidirlər. Onlar hər biri xalqın seçdiyi şəxslərdir. Buna görə də xalqın şikayətini ictimailəşdirməlidirlər. Problemin həllinə çalışmalıdırlar"

Çiçək Sadatova

Telegramda izləyin